- वि.सं २o८१ जेठ १३ आइतबार
आसन्न स्थानीय तह निर्वाचनका लागि रुकुम पूर्वको भुमे गाउँपालिका अध्यक्षमा कांग्रेसबाट उम्मेदवारी दिएका भीमबहादुर ओलीले आफ्नो उम्मेदवारी फिर्ता लिएका छन् । कांग्रेस र नेकपा एमालेको गठबन्धन बनाएर गाउँपालिका अध्यक्ष र उपाध्यक्षमा उम्मेदवारी परेको थियो । उक्त गठबन्धनअनुसार कांग्रेसले अध्यक्ष र एमालेले उपाध्यक्ष पदमा उम्मेदवारी दिने भागबन्डा भएको थियो । तर, अध्यक्षका उम्मेदवारले नै उम्मेदवारी फिर्ता लिएपछि प्रमुख र उपप्रमुखमा कांग्रेस उम्मेदवारविहीन भएको छ ।
सत्तागठबन्धनभन्दा बाहिर गएर कांग्रेसले यस गाउँपालिकामा नेकपा एमालेसँग तालमेल गरेको थियो । तालमेलअनुसार कांग्रेसले अध्यक्ष र एमालेले उपाध्यक्ष पाउने गरी भागबन्डा गरेका थिए । तर, कांग्रेसका उम्मेदवारले उम्मेदवारी फिर्ता लिएपछि एमालेबाट उपाध्यक्षमा कमानसिंह डाँगी प्रतिस्पर्धामा छन् । कांग्रेसले उम्मेदवारी फिर्ता लिएपछि माओवादी केन्द्रका होमप्रकाश श्रेष्ठ, राष्ट्रिय जनमोर्चाका कमान पुन र मंगोल नेसनल अर्गनाइजेसनका रतन पुनले अध्यक्षमा प्रतिस्पर्धा गर्ने भएका छन् ।
