समाचार डिजिटल संस्करण

बालिका बलात्कार गर्नेलाई १८ वर्ष कैद फैसला

१२ वर्षीया बालिकालाई बलात्कार गरेको ठहर गर्दै जिल्ला अदालत मकवानपुरले एक युवकलाई १८ वर्ष कैद सजायको फैसला गरेको छ । शुक्रबार जिल्ला न्यायाधीश डिल्लीरत्न श्रेष्ठको एकल इजलासले पीडितलाई पीडकबाट एक लाख रुपैयाँ क्षतिपूर्ति रकम भराउन पनि आदेश गरेको श्रेस्तेदार तीर्थ भट्टराईले जानकारी दिए ।

अदालतले हेटौँडा उपमहानगरपालिका- ११ का ३९ वर्षीय विमल लामालाई १८ वर्ष कैद सजाय सुनाएको श्रेस्तेदार भट्टराईले बताए। अभियुक्त लामाले १२ वर्षीया बालिकालाई बलात्कार गरेको ठहर गर्दै अदालतले उक्त फैसला गरेको हो। 

लामामाथि २ असार २०७८ मा बालिकालाई हेटौँडा उपमहानगरपालिका- १० स्थित एक होटेलमा लगेर बलात्कार गरेको आरोप थियो । चितवनबाट हेटौँडा घर आएकी बालिका राति बसपार्कमा ओर्लिएकी थिइन् । लामाले बालिकालाई घर पुर्‍याइदिने भन्दै झुक्याएर होटेलमा लगेर बलात्कार गरेको प्रहरी अनुसन्धानबाट खुलेको थियो। लामालाई क्षेत्रीय कारागार भीमफेदी पठाइएको छ।