मुख्य समाचार प्रिन्ट संस्करण

१० महिनाको अवधिमा झापामा तीन ठूला उद्योगमा आगलागी

जुत्ता उद्योगमा आगलागी भएको दुई साता नबित्दै शनिबार मेचीनगर नगरपालिकास्थित मगमग चाउचाउ उद्योगमा आगजनी, एक अर्ब बढीको क्षति

झापाको मेचीनगरस्थित काँकडभिट्टामा जुत्ता उद्योगमा आगलागी भएको ९ दिनमा फेरि अर्को ठूलो उद्योगमा आगलागी भएको छ । मेचीनगर–१४ स्थित दुहागढीमा मगमग चाउचाउ उद्योगमा आगलागी भएको हो । 

शनिबार बिहान साढे ४ बजेबाट सुरु भएको आगो १३ घन्टापछि नियन्त्रणमा आएको जिल्ला प्रहरी कार्यालय झापाले जनाएको छ । आगो नियन्त्रणका लागि नेपाली सेना, नेपाल प्रहरी र सशस्त्र प्रहरी खटिएका थिए । प्रहरीले विद्युत् सर्ट भएर आगो लागेको हुन सक्ने अनुमान गरेको छ । 

अजय अग्रवाल, सञ्चालक, मगमग चाउचाउ उद्योग

सुरुमै एक अर्ब लगानी थियो । पछि पनि थपेका थियौँ । प्राविधिक जाँच नगरी यकिन भन्न सकिँदैन । त्यसैले एक अर्बभन्दा बढीको क्षति भयो ।

जिल्ला प्रहरी कार्यालय झापाका प्रवक्ता प्रहरी नायब उपरीक्षक वसन्त पाठकका अनुसार आगो नियन्त्रणका लागि झापा, मोरङ, सुनसरी र इलामका १५ वटा दमकल प्रयोग भएको थियो । काँकडभिट्टामा आगलागी हुँदा सहयोग गर्न भारतको पश्चिम बंगालबाट पनि दमकल आएको थियो । यसपटक पनि भारतसँग दमकल पठाइदिन आग्रह गरिए पनि सीमाबाट सात किलोमिटर टाढा भएका कारण नआएको उनले बताए । 

यो चाउचाउ उद्योग झापामा एक मात्र चाउचाउ उद्योग रहेको सञ्चालक अजय अग्रवालले बताए । चाउचाउ उद्योगमा लागेको आगो नियन्त्रण गर्न लामो समय लागेकाले क्षतिको विवरण अझै यकिन गर्न नसकिएको जिल्ला प्रहरी कार्यालय झापाका प्रवक्ता प्रहरी नायब उपरीक्षक पाठकले बताए । ‘सञ्चालकहरूले प्राविधिक जाँच नगरी क्षति कति भयो भन्न सकिँदैन भन्नुभएको छ,’ उनले भने, ‘अनुमानका भरमा क्षतिको विवरण भन्न सकिँदैन ।’ 

सञ्चालक अग्रवालले उद्योगमा एक अर्ब बढीको लगानी भएको बताए । उद्योग पूर्ण रूपमा जलेर नष्ट भएको उनको दाबी छ । ‘सुरुमै एक अर्ब लगानी थियो । पछि पनि थपेका थियौँ । प्राविधिक जाँच नगरी यकिन भन्न सकिँदैन । त्यसैले एक अर्बभन्दा बढीको क्षति भयो,’ उनले भने । 

तीन वर्षअघिबाट उत्पादन सुरु भएको मगमग चाउचाउ दैनिक १५ हजार कार्टुन उत्पादन हुँदै आएको अग्रवालले बताए । ‘दैनिक १२ घन्टा उत्पादन हुन्थ्यो । बजारमा निकै खोजिने चाउचाउ पनि हो । छोटो समयमा निकै राइज भएको थियो,’ उनले नयाँ पत्रिकासँग भने, ‘उत्पादनको आधा त भारतको पश्चिम बंगालमा निर्यात हुन्थ्यो । भारतमा पनि व्यापार राम्रो थियो ।’

एक अर्बभन्दा बढी क्षति भएको प्रारम्भिक अनुमान
मेचीनगरमा रहेका ठूला उद्योगमा धमाधम आगलागीका घटना भइरहेका छन् । पछिल्लो ११ महिनामा मात्र मेचीनगरका तीन ठूला उद्योगमा आगलागी भएको हो । तीनवटै उद्योगमा लागेको आगोका कारण विद्युत् सर्टलाई देखाइएको छ । स्थानीय प्रशासनले सूक्ष्म ढंगले आगलागीका कारण  अनुसन्धान गरेको पाइँदैन । 

२० माघमा मेचीनगर–६ काँकडभिट्टाको एसएस फुटवेयरमा आगलागी भएको थियो । जुत्ता उद्योगमा आगलागी हुँदा साढे नौ करोडको क्षति भएको थियो । एसएस फुटवेयर पूर्वकै ठूलो जुत्ता उद्योग हो । विद्युत् सर्ट भएर आगोलागेको प्रहरीले जनाएको छ । 

यसअघि २० वैशाख ०७८ मा मेचीनगरको एक ठूलो उद्योगमा आगलागी भएको थियो । मेचीनगर–१५ ज्यामिरगढीको पराजुली बायोमास ब्रिकेट फ्याक्ट्रीमा आगलागी भएको थियो । सो उद्योगमा आगलागी हुँदा १५ करोड रुपैयाँ राबरको क्षति भएको प्रहरीले जनाएको छ । त्यसमा पनि विद्युत् सर्ट भएरै आगो लागेको निचोड निकालिएको थियो ।