क्रिसमसको दिन साढे चार हजारभन्दा बढी उडान रद्द

विश्वका धेरै देशमा मनाइने क्रिसमस पर्वको दिन चार हजार ५०० भन्दा बढी विमान उडान रद्द भएका छन्। अत्यधिक यात्रा हुने दिनका रूपमा समेत चिनिने क्रिसमसका दिन शनिबार यति धेरै विमान सेवा रद्द भएको अधिकारीहरूले जनाएका छन्।

कोरोना भाइरसको नयाँ भेरियन्टका रूपमा देखिएको ओमिक्रोनको संक्रमण थप फैलिने डरले क्रिसमसकै दिनको उडान पनि रद्द भएको हो। त्यसैगरी, अरू हजारौँ उडानमा ढिलाइ पनि भएको उडानसम्बन्धी सूचना प्रवाह गर्ने वेबसाइड फ्लाइट अवेर डटकममा उल्लेख गरिएको छ।

उडान रद्द तथा ढिलाइ हुँदा अमेरिकी राष्ट्रपति जो वाइडेनसहित विश्वका प्रभावशाली व्यक्तिसमेतलाई असर परेको छ। यसअघि गत शुक्रबार मात्रै २४ सयभन्दा बढी उडान रद्द भएका थिए भने ११ हजारभन्दा बढी उडानमा ढिलाइ भएको थियो। यो समाचार तयार पार्दासम्ममा आगामी आइतबारका लागि तय भएका ६०० भन्दा बढी उडान पनि रद्द भइसकेका र अरू पनि धेरै उडा रद्द हुन सक्ने बताइएको छ। रासस/एएफपी