- वि.सं २०७८ मङ्सिर १६ बिहीबार
अमेरिकाको वासिङ्टन डिसीमा भएको गोली काण्डमा परी कम्तीमा तीनजनाको मृत्यु भएको र अन्य तीनजना घाइते भएको स्थानीय प्रहरीले जनाएको छ। लङफेलो स्ट्रिट– ६०० ब्लक, उत्तरपश्चिममा स्थानीय समयअनुसार शनिबार साँझ साढे सात (ग्रिनविच समय ११ः३०) बजे गोली चलेको अमेरिकी प्रहरीले पुष्टि गरेको छ।
डिसी प्रहरी विभागले ट्विटरमार्फत जारी गरेको विज्ञप्तिमा भनिएको छ, ‘आक्रमणबाट तीनजनाको मृत्यु भएको छ र तीनजना घाइते भएका छन्। उनीहरूको अवस्था सामान्य रहेको छ।’
डिसी प्रहरी प्रमुख रबर्ट कोन्टेले सञ्चारकर्मीलाई दिएको जानकारीअनुसार संदिग्धहरू एक्कासि गाडीबाट बाहिर निस्किएर मानिसहरूको भिडमा अन्धाधुन्ध गोली हानेका प्रत्यक्षदर्शीको भनाइ तथा प्रहरीको प्रारम्भिक अनुसन्धानले देखाएको छ। मृतक सबै वयस्क हुन् । प्रहरीले गोली चलाउने समूहको बारेमा जानकारी ल्याउने जोसुकैलाई पनि ७५ हजार अमेरिकी डलरको इनामको घोषणा गरेको छ। रासस
