- वि.सं २o८१ जेठ ६ आइतबार
भारतीय सीमा सशस्त्र बल (एसएसबी) ले तुइन फुकालिदिँदा महाकाली नदीमा दार्चुलाका जयसिंह धामी बेपत्ता भएको घटनाको छानबिन १७ दिन पुग्दा पनि सकिएको छैन । तोकिएको समयभित्र नसकिएपछि गृह मन्त्रालयले छानबिन समितिलाई फेरि एक साताको समय थप गरेको छ ।
सहसचिव जनार्दन गौतम नेतृत्वको समितिलाई गृहले मंगलबार एक साताको समय थपेको हो । १० दिनको समयसीमा दिएर प्रतिवेदन बुझाउने गरी १७ साउनमा छानबिन समिति गठन गरिएको थियो । १० दिनमा नसकिएपछि एक साता थपिएकोमा दोस्रोपटक एक साता थपिएको हो ।
गत १५ साउनमा दार्चुला व्याँस गाउँपालिका–२ का जयसिंह धामी भारत जाने क्रममा खाङदाङ मालघाटमा रहेको तुइनबाट खसेर बेपत्ता भएका थिए । तुइनबाट भारत जानेक्रममा पारितर्फ रहेका एसएसबीले तुइन फुकालिदिएको स्थानीयले बताएका छन् ।
घटनाको १९ दिन भइसक्दा पनि उनको अवस्था पत्ता लाग्न सकेको छैन । सरकारले छानबिन प्रतिवेदनका आधारमा यस विषयमा भारतसँग कुरा गर्ने बताउँदै आएको छ । तर, छानबिनमै ढिलाइ हुँदा भारतसँग यस विषयमा कुरा हुन सकेको छैन । छानबिन समितिका संयोजक रहेका सहसचिव गौतमले अबको एक साताभित्र प्रतिवेदन बुझाइने बताए ।
छानबिन समितिले महाकालीमा बेपत्ता जयसिंहको खोजी गर्न ड्रोन प्रयोग गरे पनि अझै फेला परेका छैनन् । उनको खोजी गर्न ड्रोनसहित नेपाल प्रहरीका प्रहरी नायव निरीक्षक (सइ) प्रेम गन्धर्व र सइ गोविन्द परियार नेतृत्वको टोली २४ साउनमा दार्चुला पुगेको थियो ।
नेपालले २३ साउनमा जिल्ला प्रशासन कार्यालय दार्चुलाको सीमा नदीमा ड्रोन प्रयोग गर्न भारतीय पक्षसँग अनुमति माग गरेको थियो । भारतीय प्रशासनले पत्रको कुनै जवाफ नदिएपछि नेपाल प्रहरीले व्याँस गाउँपालिकाको मालघाट हुँदै दत्तुसम्म नेपाली भूमिमा ड्रोन उडाएको हो ।
