राष्ट्रिय कविता महोत्सव २०७७ मा नुवाकोटकी भैरवी भूगोल प्रथम भएकी छिन् । ‘नेपालको गीत’ कविताबाट भूगोलले प्रथम स्थान हासिल गरेकी हुन् । ‘संकल्प’ कविताबाट लमजुङका कवि प्रज्ज्वल अधिकारीले दोस्रो स्थान हासिल गरे ।

प्रतिष्ठानको ६७औं वार्षिकोत्सवको अवसरमा आयोजित महोत्सवमा ‘आमाको आदेश’ कविताबाट गणेशप्रसाद खतिवडा, ‘आमा ः एक विश्वविद्यालय’ शीर्षकको कविताबाट देवकी अभिलाषी’, ‘समृद्ध नेपालको सपना’ शीर्षकको कविताबाट रेजिना आपगाईले संयुक्त रूपमा तेस्रो स्थान हासिल गरे । 

प्रत्येक वर्ष असारमा आयोजना हुने महोत्सव यस वर्ष भने कोभिड महामारीका कारण मंसिरमा आयोजना भएको हो । देशभरबाट प्राप्त पाँच सयभन्दा बढी कवितामध्येबाट तीस कविता अन्तिम चरणका लागि छनोट भएका थिए । 

पुरस्कृत कविहरूलाई राष्ट्रपतिको समय मिलाएर एक विशेष समारोहका बीच पुरस्कार वितरण गरिने प्राज्ञ सभा सदस्य तथा प्रतिष्ठानका संयोजक कवि शशी लुमुम्बुले जानकारी दिए । प्रतिष्ठानले यस वर्ष पुरस्कार रकम बढाएर पचास हजार पुर्‍याएको थियो । पुरस्कृत कविहरूले क्रमशः पचास हजार, चालीस हजार, तीस हजारको साथमा पदक र प्रमाणपत्र पाउनेछन् ।