मुख्य समाचारफ्रन्ट पेजसमाचारदृष्टिकोणअर्थअन्तर्वार्तामल्टिमिडियाखेलकुदविश्वप्रवासकोरोना अपडेटकर्नर किकसम्पादकीयस्वास्थ्य र जीवनशैली१३औँ वार्षिकोत्सव विशेषांकफिचरलाेकसेवा१४औँ वार्षिकोत्सव विशेषांकप्रेरक प्रसंग१२औँ वार्षिकोत्सव विशेषांकसप्तरंगटर्निङ प्वाइन्ट्स-२०१९टर्निङ प्वाइन्ट्स-२०२०प्रदेशब्लगEnglishटर्निङ प्वाइन्ट्स-२०२१
  • वि.सं २०७८ बैशाख १० शुक्रबार
  • Friday, 23 April, 2021
एजेन्सी
२०७७ मङ्सिर २३ मंगलबार १६:०१:००
Read Time : < 1 मिनेट
विश्व

दिल्लीका मुख्यमन्त्री केजरीवाललाई घरमा नजरबन्द गरेको आम आदमी पार्टीको आरोप 

Read Time : < 1 मिनेट
एजेन्सी
२०७७ मङ्सिर २३ मंगलबार १६:०१:००

दिल्लीका मुख्यमन्त्री अरविन्द केजरीवाललाई गृह मन्त्रालयको निर्देशनमा केन्द्र सरकारले घरमै नजरबन्द गरेको आम आदमी पार्टीले आरोप लगाएको छ । दिल्ली प्रवेश गर्ने नाकामा आन्दोलनरत किसानहरूलाई सर्मथन गर्न सोमबार केजरीवाल आन्दोलनस्थलमा पुगेका थिए । उनले आन्दोलनरत किसानहरूको अवस्थाबारे पनि सोधपुछ गरेका थिए । आज पनि पुनः आन्दोलनरत स्थलमा जान सक्ने आशंकामा केजरीवाललाई नजरबन्दमा राखिएको हुन सक्ने आम आदमी पार्टीको भनाइ छ ।  

तर, दिल्ली पुलिसले केजरीवाललाई नजरबन्दमा नराखेको बताएको छ । दिल्लीको उत्तरी क्षेत्रमा कार्यरत डिसिपी एंटो अल्फोसका अनुसार अन्य दलसँग किसानहरूको झडप नहोस् भनेर प्रहरी परिचालन गरिएको हो । यो सामान्य अवस्था हो । तर, मुख्यमन्त्रीलाई नजरबन्द भने नगरिएको उनले बताए । 

आम आदमी पार्टीका नेता सौरभ भारद्वाजका अनुसार केन्द्र सरकारले दिल्ली सरकारलाई आन्दोलनरत सबै किसानलाई दिल्ली स्टेडियम ल्याएर कैद गर्न दबाब दिएको थियो । तर, मुख्यमन्त्री केजरीवालले किसान आन्दोलनलाई सर्मथन गर्दै केन्द्र सरकारको भनाइ अस्वीकार गरेको उनको भनाइ छ । उनले ट्विटरमा लेखेका छन्, ‘हामी किसानको साथ छोड्न सक्दैनौं । किनकी उनीहरू हाम्रा अन्नदाता हुन् ।’ उनले केन्द्र सरकार किसानसँग डराएको पनि बताएका छन् । किसानहरूको जायज मागलाई आम आदमी पार्टीको समर्थन छ । यसकारण मुख्यमन्त्रीको घर घेर्न गृह मन्त्रालयले प्रहरीलाई आदेश दिएका हुन् ।  

सरकारले हालै जारी गरेको कृषिसम्बन्धी कानुनको विरोध गर्दै भारतका किसान आन्दोलनमा उत्रिएका छन् । व्यापारी पोस्ने र किसानलाई चुस्ने खालको कानुन सरकारले ल्याएको आन्दोलनरत किसानहरूको आरोप छ । यो कानुन फिर्ता नलिएसम्म आन्दोलन नरोकिने किसानहरूको चेतावनी छ । सरकारका प्रतिनिधि र आन्दोलनरत किसानबीच पटक–पटक वार्ता भए पनि निष्कर्षमा पुग्न सकेको छैन । किसानहरूले वार्ता र आन्दोलन सँगसँगै जारी राखेका छन् ।