प्रदेश ५ को स्थायी राजधानी र नामकरणसम्बन्धी प्रस्ताव शुक्रबार प्रदेश सभामा पेस भएको छ । प्रदेश ५ मा राजधानी र नामकरणको विषय पेचिलो बनिरहेको अवस्थामा सरकारले आज प्रस्ताव पेस गरेको हो ।
प्रदेश सभाको बैठकमा आन्तरिक मामिला तथा कानुनमन्त्री कुलप्रसाद केसीले प्रदेशको स्थायी राजधानी दाङ र प्रदेशको नाम लुम्बिनी राख्न प्रस्ताव गरेका छन् ।
मन्त्री केसीले प्रदेश सभा बैठकमा पेस गरेको प्रस्तावमा प्रदेशको राजधानी दाङ जिल्लाको राप्ती र गडवा गाउँपालिका तथा अर्घाखाँचीकाे शीतगंगा नगरपालिकाले चर्चेको राप्ती नदी किनारको मैदाने भाग राप्ती उपत्याका देउखुरीलाई प्रदेशको स्थायी राजधानी तोकियोस् भन्ने प्रस्ताव पेस गरेका छन् ।
उनले प्रदेशको नाम शान्तिका अग्रदूत गौतम बुद्धको जन्मस्थल लुम्बिनीका नामबाट प्रदेशको नाम लुम्बिनी नामकरण गरियोस् भन्ने प्रस्ताव पेस गरेका छन् ।