चिनियाँ तथा हलिउड अभिनेत्री सु छिङ बर्दिया पुगेकी छन् । नेपाल भ्रमण वर्ष २०२० को सद्भावना दूतको रुपमा रहेकी अभिनेत्री छिङ भ्रमणको क्रममा बर्दिया पुगेकी हुन् ।
भ्रमणसँगै पर्यटकीय क्षेत्रको प्रचारका लागि छिङ शनिबार बिहान पुगेको उनकाे सहयोगीले बताएका छन् । उनले बाँसगढी नगरपालिकाको केदारेश्वर धाम, बारबर्दिया नगरपालिकाको सत्खलुवा ताल, ठाकुरबाबा नगरपालिका र बर्दिया राष्ट्रिय निकुञ्ज घुमेकी छन् । बाँसगढी नगरपालिकाका मेयर शालिकराम अधिकारीले उनलाई जिल्लामा स्वागत गरेका थिए ।
यस्तै भुरिगाउँ बजारमा अभिनेत्री छिङलाई स्वागत गर्दै ठाकुरबाबा नगरपालिकाका प्रमुख घननारायण श्रेष्ठले नगरपालिका र बर्दिया राष्ट्रिय निकुञ्जको बारेमा जानकारी गराएका थिए । उनी चीन पुगेर नेपाल भ्रमणकाे प्रचार प्रसार गर्ने बताएकी छन् । उनले भावी दिनमा चिनियाँ नागरिकहरु पनि बर्दिया घुम्न आउने बताइन् ।