- वि.सं २o८२ बैशाख २४ बुधबार
मिलन चाम्सको निर्देशनमा बन्ने आगामी फिल्म ‘सुम्निमा’मा मुख्य अभिनेत्री उपासना सिंह ठकुरी अनुबन्धित भएकी छिन्। प्रेमकथामा आधारित हुने यो फिल्म नेपाली र अंग्रेजी भाषामा निर्माण हुनेछ । ‘सुम्निमा’मा उपासना अनुबन्ध भएसँगै उनको जोडीको रूपमा काम गर्ने अभिनेताका लागि अडिसन आह्वान गरिएको छ। २० देखि २६ वर्षको युकेमा रहेको व्यक्तिले अडिसनमा भाग लिन पाउने पनि बताइएको छ।
निर्देशक चाम्सले युनिभर्सल कथा र अन्तर्राष्ट्रिय बजारलाई लक्षित गर्दै फिल्म बन्ने बताए। ‘कथावस्तु पनि युनिभर्सल भएकाले पनि विदेशी बजारलाई लक्षित गर्दै फिल्म बन्नेछ,’ चाम्सले भने । नेपाल र बेलायतमा यो फिल्म जुलाईदेखि छायांकन हुनेछ। चाम्स इन्टरटेनमेन्ट र गोर्खा फिल्म्सकाे संयुक्त ब्यानरमा बन्ने फिल्म निर्देशक चाम्सको ११औँ निर्देशकीय प्रोजेक्ट हुनेछ ।
फिल्ममा राजीव थापाको कथा र पटकथा रहनेछ । चाम्सको निर्देशनमा बनेको बायोपिक सिनेमा ‘अञ्जिला’ले सफल प्रदर्शनको ५१औँ दिन पार गरिसकेको छ। ‘अञ्जिला’ले प्राप्त गरेको सफलतासँगै चाम्सलाई आगामी प्रोजेक्ट उत्कृष्ट बनाउनुपर्ने चुनौती छ। कथा राम्रो भएको र टिम राम्रो हुने हुँदा ‘सुम्निमा’ उत्कृष्ट सिनेमा बन्नेमा चाम्स ढुक्क देखिएका छन्। चलचित्रका अन्य प्राविधिक र टिमको बारेमा पछि मात्र जानकारी दिने चाम्सले बताए।
