Skip This
सिराहाको लहानबाट प्रहरीले ठूलो परिमाणमा प्रतिबन्धित लागुऔषधसहित दुई युवकलाई पक्राउ गरेको छ।
जिल्ला प्रहरी कार्यालय सिराहाका अनुसार लहान नगरपालिका– १९ का करिब २४ वर्षीय सन्तोषकुमार साह र स्थानीय २५ वर्षीय शिवनाथ महतोलाई लागुऔषधसहित पक्राउ गरिएको हो।
लहान नगरपालिका– ३ मा पर्ने पूर्व–पश्चिम सडकको बस स्ट्यान्डमा अस्पताल चोकतिरबाट आउँदै गरेको प्रदेश २–०१–००१ प ७३८० नम्बरको मोटरसाइकलमा रहेका दुईजनालाई लहान प्रहरी र लागुऔषध नियन्त्रण ब्युरो गोलबजारको संयुक्त टोलीले पक्राउ गरेको हो।
मोटरसाइकल रोकेर दुवैजनालाई खानतलासी गर्दा साहले बोकेको कपडाको झोलामा एक सय ३३ एम्पुल फेनार्गन, एक सय ३५ एम्पुल बुप्रेनोर्फिन र एक सय ३४ एम्पुल डाइजिपाम फेला परेको प्रहरीले जनाएको छ।
पक्राउ परेका दुवैलाई लहानस्थित इलाका प्रहरी कार्यालयमा राखेर थप अनुसन्धान भइरहेको छ।
