समाचार डिजिटल संस्करण

भारतीय कुखुरा नेपाल भित्रिँदा नेपाली किसान मारमा

खुला सीमाका कारण भारतीय कुखुरा निर्वाध रूपमा रौतहटको विभिन्न नाका हुँदै छिरेपछि नेपाली कुखुरा उत्पादक किसान मारमा परेका छन्। सीमावर्ती क्षेत्रमा रहेका सशस्त्र प्रहरी र नेपाल प्रहरीको मिलेमतोमा भारतीय तस्करले नेपालमा भारतीय कुखुरा भित्र्याउन थालेपछि त्यसको असर नेपाली किसानमा पर्न थालेको छ ।

सीमामा तैनाथ रहने नेपाल प्रहरी र सशस्त्र प्रहरीले वेलावेलामा भारतीय कुखुरा बरामद गरेर नष्ट गर्ने गरेको भए पनि भारतबाट आउने कुखुराका कारण नेपाली किसान संकटमा परेको उनीहरूले गुनासो गरेका छन् ।

भारतबाट लुकाइछिपाई नेपाल भित्र्याउन लागेको ६० वटा ब्राेइलर कुखुरा सोमबार नेपाल प्रहरीले बरामद गरेर नष्ट गरेको छ । साइकलमा भारतबाट लोड गरेर नेपालतर्फ ल्याउँदै गरेको अवस्थामा कोपुवा पिपरिया प्रहरी चौकीले ६० वटा कुखुरा बरामद गरेको हो । कुखुरासँगै कुखुरा ल्याउन प्रयोग गरिएको चारवटा साइकलसमेत प्रहरीले बरामद गरेको छ । ३८ हजार चार सय मूल्यबराबरको कुखुरा प्रहरीले नष्ट गरेको हो ।

खुला सीमाका कारण भारतीय ब्राेइलर कुखुरा सहजै नेपाली बजारमा छिर्न थालेपछि नेपाली किसान प्रत्यक्ष मारमा परेको कुखुरा व्यवसायी रामविनोद पाण्डेको भनाइ रहेको छ । वेलावेलामा सीमावर्ती क्षेत्रबाट नेपाल भित्रिने भारतीय ब्राेइलर कुखुरा नेपाल प्रहरी र सशस्त्र प्रहरीले बरामद गरेर नष्ट गर्ने गरेको भए पनि नेपाल भित्रिने क्रम रोकिन नसकेको पाण्डेको भनाइ रहेको छ ।

रौतहटका कुखुरा व्यवसायीले सीमा मात्रै सशस्त्र प्रहरी र नेपाल प्रहरीको मिलेमतोमै भारतीय ब्राेइलर कुखुरा सहजै नेपाली बजारमा आउने गरेको आरोप लगाउँदै आएका छन् । नेपालमा उत्पादन भएका ब्राेइलर कुखुराको तुलनामा भारतबाट आउने ब्राेइलर कुखुरा सस्तो पर्ने भएका कारण नेपाली बजारमा भारतीय कुखुरा बढी बिक्री  हुने हुँदा नेपाली कुखुरा उत्पादक किसान मारमा परेको उनीहरूको गुनासो छ ।

भारतीय ब्राेइलर कुखुराको चल्ला र मासु प्रयोजनका लागि ठूलै ब्राेइलर कुखुरा नेपाल भित्रिन थालेपछि रौतहटका कुखुरा उत्पादक किसान समस्यामा परेको भन्दै उनीहरूले भारतीय कुखुरा आयातमा रोक लगाउन सुरक्षा निकायसँग माग गरेका छन् ।