अर्थ प्रिन्ट संस्करण

बैंक ब्याजदर बढ्दा बिमा कम्पनीको नाफामा वृद्धि

व्यवसायमा उत्साह छैन, तर नाफामा दोहोरो अंकको वृद्धि

आर्थिक शिथिलताका कारण बिमा व्यवसायमा निराशा देखिए पनि बिमा कम्पनीहरूको नाफामा भने दोहोरो अंकको वृद्धि देखिएको छ । चालू आर्थिक वर्ष ०८०/८१ को पहिलो त्रैमासमा जीवन तथा निर्जीवन बिमाहरूको खुद नाफा औसतमा २७ प्रतिशतले बढेको छ ।

हाल नेपालमा १४–१४ वटा जीवन तथा निर्जीवन बिमा कम्पनी सञ्चालनमा छन् । उनीहरूले हालै सार्वजनिक गरेको पहिलो त्रैमासको वित्तीय विवरणसम्बन्धी प्रतिवेदनले यस्तो देखाएको हो । समीक्षा अवधिमा वाणिज्य बैंकहरूको नाफा २८ प्रतिशतले घटेको छ । तर, बिमा कम्पनीहरूको नाफा भने २७ प्रतिशतले बढेको प्रतिवेदनले देखाएको छ । समीक्षा अवधिमा २८ कम्पनीले दुई अर्ब ६९ करोड ९२ लाख रुपैयाँ खुद नाफा कमाएका छन् । गत आवको सोही अवधिमा उनीहरूको नाफा दुई अर्ब १२ करोड ८२ लाख रुपैयाँ रहेको थियो । 

बिमा कम्पनीहरूको यो नाफा बिमांकीय मूल्यांकनभन्दा अघिको हो । बिमांकीय मूल्यांकन गर्दा कम्पनीको बिमा कोषको १० प्रतिशतसम्म रकम नाफा–नोक्सान खातामा सार्न सकिन्छ । त्यसले गर्दा बिमा कम्पनीहरूको नाफा थप बढ्न छ । बिमा कम्पनीहरूले आफ्नो व्यवसाय तथा वित्तीय विवरणको लेखापरीक्षण मात्रै गरेर हुँदैन । बिमा दाबी, जोखिमलगायतका विषयलाई समेटेर थप बिमांकीय मूल्यांकन पनि गर्नुपर्ने हुन्छ ।

 जीवन बिमा कम्पनीको नाफामा ३३% वृद्धि 
समीक्षा अवधिमा जीवन बिमा कम्पनीको मात्रै नाफा ३३ प्रतिशतले बढेको छ । गत आवको पहिलो त्रैमासमा १४ जीवन बिमा कम्पनीको नाफा एक अर्ब २९ करोड ४८ लाख रुपैयाँ थियो । यसपालि त्यो एक अर्ब ७१ करोड ९९ लाख रुपैयाँ पुगेको छ ।

जीवन बिमा कम्पनीतर्फ नाफा कमाउने मामिलामा हिमालयन लाइफ इन्स्योरेन्स कम्पनी पहिलो नम्बरमा छ । उक्त कम्पनीले समीक्षा अवधिमा २४ करोड १३ लाख ९७ हजार रुपैयाँ नाफा कमाएको छ । दोस्रो नम्बरमा एसियन लाइफ इन्स्योरेन्सले १६ करोड ६१ लाख ६६ हजार नाफा कमाएको छ । तेस्रो स्थानमा रहेको सन नेपाल लाइफले भने १६ करोड ५३ लाख २७ हजार नाफा कमाएको छ । 

 निर्जीवन बिमा कम्पनीको नाफामा १८% वृद्धि 
समीक्षा अवधिमा १४ निर्जीवन बिमा कम्पनीको औसत नाफा भने १८ प्रतिशतले बढेको छ । गत आवको पहिलो त्रैमासमा उनीहरूको नाफा ८३ करोड ३३ लाख १९ हजार रुपैयाँ थियो । यसपालि उनीहरूको नाफा बढेर ९७ करोड ९२ लाख ८२ हजार रुपैयाँ पुगेको छ । 

निर्जीवनतर्फ नाफा कमाउने मामिलामा नेपाल इन्स्योरेन्स अग्रस्थानमा देखिएको छ । पहिलो त्रैमासमा उक्त कम्पनीले १४ करोड ६१ लाख ७६ हजार रुपैयाँ नाफा कमाएको छ । दोस्रोमा भने सिद्धार्थ प्रिमियर इन्स्योरेन्स रहेको छ । समीक्षा अवधिमा उक्त कम्पनीले १४ करोड ६१ हजार रुपैयाँ नाफा कमाएको छ । तेस्रो स्थानमा रहेको राष्ट्रिय बिमा कम्पनीले भने १३ करोड ७६ लाख ६५ हजार रुपैयाँ नाफा कमाएको छ । 

 किन बढ्यो नाफा ?
आर्थिक शिथिलताका कारण समीक्षा अवधिमा बिमा व्यवसायमै उत्साह छैन । निर्जीवन बिमाको व्यवसाय पूर्ण रूपमै घटेको छ । जीवन बिमातर्फ पनि पहिलो व्यवसायमा संकुचन आएको छ । पोलिसी सरेन्डर बढ्ने तथा बिमाको पहुँच घट्नेजस्ता नराम्रा संकेत बिमा क्षेत्रमा देखिएका छन् । त्यो अवस्थामा पनि बिमा कम्पनीहरूको नाफा बढेको हो । विशेष गरी बैंकको निक्षेपको ब्याजदर उच्च हुँदा नाफामा वृद्धि देखिएको हो । 

बिमा कम्पनीहरूले आफ्नो लगानीयोग्य पुँजीमध्ये ७० प्रतिशतभन्दा बढी पैसा बैंकको मुद्दती निक्षेपमा राख्छन् । त्यो अवस्थामा मुद्दती निक्षेपबापत आउने ब्याज आम्दानी नै बिमा कम्पनीको मुख्य आम्दानीको स्रोत हो । गत आवमा देखिएको तरलता अभावको अवस्थालाई दृष्टिगत गर्दै बैंकहरूले बढाएको ब्याजदर अझै पनि उच्च नै छ । त्यसकारण बिमा कम्पनीहरूमा ब्याजमार्फत हुने आम्दानी पनि उच्च छ । ‘आर्थिक शिथिलताले गर्दा बिमा कम्पनीहरूको व्यवसाय उत्साहजनक छैन । तर, बैंकको ब्याजदर उच्च हुँदा नाफा भने बढेको देखिन्छ,’ नेपाल बिमा प्राधिकरणका कार्यकारी निर्देशक राजुरमण पौडेलले भने ।