भारतीय नम्बर प्लेटको मोटरसाइकलमा आएका चारजनाले हानेका थिए प्रधानाध्यापक स्वर्णकारलाई गोली

गोली प्रहार गरी प्रधानाध्यापकको हत्या

बाराको कलैयास्थित बाल एकता बोर्डिङ स्कुलका प्रधानाध्यापक गुड्डु भनिने रुपेश स्वर्णकारको अज्ञात समूहले गोली हानेर हत्या गरेको छ । सोमबार अपराह्न साढे १२ बजे स्कुलनजिकै मदर्सा टोलमा मोटरसाइकलमा घर गइरहेका स्वर्णकारको दुइटा भारतीय नम्बर प्लेटको मोटरसाइकलमा आएका चारजनाले गोली प्रहार गरी हत्या गरेका हुन् । घाँटी र छातीमा गोली लागेपछि उनलाई वीरगन्जस्थित बयोधा अस्पताल लगिएको थियो । उपचारकै क्रममा उनको मृत्यु भएको प्रहरीले जनाएको छ । स्वर्णकारलाई गोली प्रहार गरेपछि हतियारधारी समूह फरार भएको थियो ।

कलैया उपमहानगरपालिका–६ निवासी स्वर्णकार छाती र घाँटीमा गोली प्रहार भएर ढलेपछि स्थानीयले उद्धार गरी कलैयास्थित प्रादेशिक अस्पताल पुर्‍याएका थिए । त्यहाँ उनलाई प्राथमिक उपचार गरी वीरगन्जस्थित नारायणी बयोधा मेडसिटी हस्पिटल लगिएको थियो । उपचारकै क्रममा उनको मृत्यु भएको बारा प्रहरी प्रमुख सुरेश काफ्लेले जानकारी दिए । 

प्रधानाध्यापक स्वर्णकारको हत्यामा संलग्न रहेको आशंकामा प्रहरीले एक महिलालाई नियन्त्रणमा लिएको छ । प्रहरीले सोमबार साँझ कलैया उपमहानगरपालिका–१ बाट एक महिलालाई नियन्त्रणमा लिएको हो । महिलाको परिचय भने प्रहरीले खुलाएको छैन । ती महिला स्वर्णकार हत्याको योजना बनाउने मुख्य योजनाकार रहेको हुन सक्ने प्रहरी स्रोतले जनाएको छ । स्वर्णकार र ती महिलाबीच निकट सम्बन्ध रहेको बुझिएको छ ।  

प्रधानाध्यापक स्वर्णकारको हत्यारालाई पक्राउ गर्न माग गर्दै कलैयामा प्रदर्शन भएको छ । हत्यामा संलग्न भएकालाई कारबाहीको माग राख्दै स्थानीयवासी र शिक्षकहरूले भरतचोकमा टायर बालेर प्रदर्शन गरेका हुन् । उनीहरूले जिल्ला सदरमुकाममै दिनदहाडै शिक्षकमाथि गोली प्रहार गरेर हत्या हुँदा पनि सुरक्षा दिन नसकेको भन्दै प्रहरी प्रशासनविरुद्ध नाराबाजी गरेका थिए । एन प्याब्सनका मधेश प्रदेश अध्यक्ष नन्दन यादवले स्वर्णकारको हत्यारालाई तत्काल पक्राउ गरी कारबाही नगरे प्रदेशभरिकै निजी शिक्षण संस्था बन्द गरेर सशक्त आन्दोलनमा उत्रिने चेतावनी दिए ।

प्रधानाध्यापकमाथि गोली प्रहार गरी हत्या भएपछि जिल्लाको शान्ति सुरक्षामा चुनौती खडा भएको जनप्रतिनिधिले आरोप लगाएका छन् । बारा १ बाट निर्वाचित प्रतिनिधिसभा सदस्य अच्युत मैनालीले सदरमुकाममा दिनदहाडै गोली प्रहार भएको घटनाले शान्ति सुरक्षाको प्रश्नमा चुनौती खडा भएको बताए । प्रधानाध्यापक स्वर्णकारको हत्यापछि जिल्लावासी त्रसित रहेको उनको भनाइ छ ।