- वि.सं २o८o भदौ २८ बिहीबार
संविधानसभाका अध्यक्ष एवं एमाले उपाध्यक्ष सुवासचन्द्र नेम्वाङको अन्त्येष्टिका लागि शवयात्रा सुरु भएको छ । नेम्वाङको निवास बालुवाटारबाट शवयात्रा भर्खरै सुरु भएको हो । नेपाली सेनाले सलामीसहित शोकधुन बजाउँदै शवयात्रा महाराजगन्ज हुँदै अगाडि बढेको छ ।
शवयात्रा शिक्षण अस्पताल, महाराजगन्ज, धुम्बाराही, चाबहिल हुँदै पशुपति आर्यघाट पुग्नेछ । नेम्वाङको पशुपति आर्यघाटमा राजकीय सम्मानका साथ अन्त्येष्टि गरिनेछ । शोक मनाउन आज सार्वजनिक बिदा पनि दिइएको छ । शवयात्राअघि बालुवाटारस्थित नेम्वाङको निवासमा एमाले अध्यक्ष केपी ओलीसहित विभिन्न दलका नेता उपस्थित थिए ।
निजी निवास बालुवाटारबाट शवयात्रासहित पशुपतिस्थित आर्यघाटमा पुर्याएर हिन्दू तथा लिम्बू परम्पराअनुसार नेम्वाङको पार्थिव शरीरलाई अन्त्येष्टि गरिनेछ । एमाले उपाध्यक्ष तथा प्रतिनिधिसभा सदस्य नेम्वाङको मंगलबार बिहान हृदयाघातबाट निधन भएको हो ।
तस्बिर : संजित परियार/नयाँ पत्रिका
