- वि.सं २o८१ बैशाख २१ शुक्रबार
सर्वोच्च अदालतमा प्रस्तावित न्यायाधीश विनोद शर्माविरुद्ध उजुरी आह्वान गरिएको छ । संसदीय सुनुवाइ समितिको शुक्रबार बसेको बैठकले शर्माविरुद्ध १० दिने उजुरी आह्वान गर्ने निर्णय गरेको सचिव पदमप्रसाद पाण्डेयले बताए ।
न्यायपरिषद्ले १० भदौमा शर्मालाई सर्वाेच्चको न्यायाधीशमा सिफारिस गरेको थियो । उच्च अदालत पाटनका न्यायाधीश शर्मा हाल सर्वोच्च अदालतमा काजमा कार्यरत छन् । उनी यसअघि पनि सर्वाेच्चका लागि सिफारिस भए पनि प्रतिनिधिसभाको कार्यकाल सकिएर सुनुवाइ हुन सकेको थिएन ।
उजुरी आह्वान भएसँगै शर्माको सुनुवाइ प्रक्रिया अगाडि बढेको छ । प्रस्तावित न्यायाधीशविरुद्ध सर्वसाधारणले अबको १० दिनभित्र उजुरी दिन पाउनेछन् । उजुरीमाथि छानबिन गरेर समितिले प्रस्तावित न्यायाधीश शर्मामाथि संसदीय सुनुवाइ गर्नेछ । समितिले नाम अनुमोदन गरेपछि राष्ट्रपतिले नियुक्त गर्ने संवैधानिक व्यवस्था छ ।
