मुख्य समाचार प्रिन्ट संस्करण

काठमाडौं भ्यु टावर २७ तलासम्म बनाउन मिल्ने

तला थप्ने वा नथप्नेबारे अध्ययन गर्दै महानगरपालिका

आठ वर्षअघि गएको भूकम्पपछि १२ तलामा सीमित भएको काठमाडौं भ्यु टावर २७ तलासम्म बनाउन सकिने भएको छ । पुल्चोक इन्जिनियरिङ क्याम्पसको टोलीले गरेको अध्ययनअनुसार भ्यु टावरमा थप १५ तलासम्म थप्न सकिन्छ । 

टोलीले काठमाडौं महानगरलाई बुझाएको अध्ययन प्रतिवेदनअनुसार १२ तलामा सीमित भएको भ्यु टावरमा तला थप्न सकिने अवस्था देखिएको महानगरका निर्देशक महेश काफ्लेले बताए । ‘इन्जिनियरिङ क्याम्पसको अध्ययनअनुसार २७–२८ तलासम्म थप्न सकिने देखाएको छ । सो अध्ययन प्रतिवेदनमाथि महानगरको प्राविधिक टोलीले अध्ययन गरिरहेको छ । महानगरको प्राविधिक टोलीको निष्कर्षपछि अगाडि बढ्छौँ,’ काफ्लेले भने । 

साउनको पहिलो साता क्याम्पसको टोलीले अध्ययन प्रतिवेदन बुझाएको हो । प्रतिवेदनको अध्ययनपश्चात् भ्यु टावरको विषयमा कसरी अगाडि बढ्ने भन्ने निर्णय हुनेछ । ‘टोलीले अध्ययन गरिरहेकाले हाललाई केही भन्न सक्ने अवस्था छैन । टोलीको अध्ययनपश्चात् कति तला बनाउने, कति समय थप गर्ने, लागत कति बढ्ने भन्नेजस्ता विषयको निक्र्योल हुनेछ,’ निर्देशक काफ्लेले भने । भ्यु टावर निर्माणका लागि ठेकेदारसँग २९ तलाको सम्झौता गरे पनि भूकम्पपछि सहरी विकास मन्त्रालयले १२ तलाभन्दा अग्लो भवन बनाउन नमिल्ने जनाएको थियो । सोहीअनुसार भदौ ०७२ मा महानगरले १२ तले भवनको नक्सा पास गरेको थियो । सोही वर्ष २५ कात्तिकमा तत्कालीन उपराष्ट्रपति नन्दबहादुर पुनले काठमाडौं भ्यु टावरको शिलान्यास गरेका थिए ।

कम्पनीले पुरानो बसपार्कको २३ रोपनी पाँच आना जग्गामा १२ तला भ्यु टावर निर्माण गरिरहेको छ । टावर निर्माण सम्झौता हुँदा करिब तीन अर्ब लाग्ने अनुमान गरिए पनि लागत बढ्ने भएको छ । निर्माण नसके पनि ठेकेदार कम्पनीले सम्झौताअनुसार राजस्व भने तिरिरहेको छ । ठेकेदार कम्पनी जलेश्वर स्वच्छन्द बिकोई बिल्डर्स कम्पनीले करिब एक करोड राजस्व बुझाउँदै आएको छ ।

बसपार्क सर्ने अझै छैन टुंगो 
टावरको सुरुवाती डिजाइनअनुसार दुईतले भूमिगत पार्किङ हुनेछ । जसमा तीन सय सवारी अटाउनेछन् । भुइँतलामा मोटरसाइकल पार्किङ रहनेछ भने पहिलो तलामा बसपार्कको काउन्टर हुनेछ ।

दोस्रो तलामा सूचना डेस्क र तेस्रो तलामा अत्याधुनिक सिनेमा हल रहनेछ । टावरमा बैंक तथा वित्तीय संस्थाहरू, स्वास्थ्य सेवा प्रवाह गर्ने स्थान, रेस्टुरेन्ट तथा पुस्तकालय हुनेछन् । महानगरपालिकाका अनुसार निर्माण हुने पार्किङ क्षेत्रले रत्नपार्क र न्युरोडआसपास पार्किङ भइरहेका सम्पूर्ण सवारीसाधनलाई धान्नेछ ।

सोहीअनुसार महानगरले गत २२ वैशाखदेखि सशुल्क पार्किङको व्यवस्था गरेको छ । महानगरले हाललाई टावरभित्र निजी पार्किङको व्यवस्था गरे पनि बसपार्क कहिलेदेखि खुल्ने भन्ने अझै टुंगो छैन ।

६ महिनाका लागि भनेर ०७२ सालमा खुलामञ्चमा सारिएको बसपार्क दुई वर्षयता तिनकुनेअगाडिको मनोहरा खोला, न्युरोडको एनएसी भवनअगाडि, खुलामञ्चअगाडिको सडक हुने गरेका छन् ।