अर्थ डिजिटल संस्करण

१२ वर्षमा १३ हजार मेगावाट विद्युत् खपत गर्ने सरकारको लक्ष्य

ऊर्जा, जलस्रोत तथा सिँचाइमन्त्री शक्ति बस्नेतले अबको १२ वर्ष (सन् ०३५) भित्र आन्तरिक बजारमा १३ हजार मेगावाट विद्युत् खपत गर्ने लक्ष्य राखेको बताएका छन् । अहिले नेपाली बजारमा विद्युतको पिक डिमान्ड दुई हजार मेगावाट हारहारी छ ।

तर, ०३५ भित्र आन्तरिक खपत १३ हजार मेगावाट पुर्‍याउने गरी ऊर्जा विकास नीति ल्याउन लागेको उनले बताए । यतिवेला मन्त्रालय वर्ष सन् २०३५ लाई टारगेट गरेर ऊर्जा विकास नीति ल्याउने तयारी गरेको छ । सोही सन्दर्भमा बिहीबार पत्रकारहरूसँगको छलफलमा मन्त्री बस्नेतले यस्तो बताएका हुन् । 

‘यो अवधिमा नेपालको आर्थिक वृद्धि वार्षिक औसतमा ७.२ प्रतिशत हाराहारी हुन्छ भन्ने आशा छ । त्योअनुसार आर्थिक वृद्धि भयो भने विद्युतको खपत पनि ०३५ भित्र १३ हजार मेगावाट पुग्ने देखिन्छ,’ उनले भने, ‘सोहीअनुसार आन्तरिक र बाह्य बजारलाई पुग्ने गरी विद्युत् उत्पादन गर्ने, पर्याप्त क्षमताको पूर्वाधार बनाउने र लगानीसमेत जुटाउने गरी ऊर्जा विकास नीति ल्याउनेछौँ ।’ 

ऊर्जा क्षेत्रको विकास गर्न स्पष्ट रूपमा तत्कालीन, अल्पकालीन र दीर्घकालीन योजना ल्याउन लागेको उनको भनाइ छ ।
 
यस्तै, उनले अबको दुई सातामा विद्युत् विधेयक संसदमा दर्ता हुने बताए । हाल उक्त विधेयक मन्त्रिपरिषदमा रहेको छ । अब मन्त्रिपरिषदबाट स्वीकृत गरेर संसदमा दर्ता गरिने उनको भनाइ छ । 

ऊर्जासचिव दिनेश घिमिरे पछिल्लो समय देखिएको विद्युत् ट्रिपिङको समस्यालाई दृष्टिगत गर्दै प्रसारण लाइनलगायतका पूर्वाधार निर्माणमा सरकारले जोड दिने बताए । साथै, ऊर्जा विकास सम्बन्धमा सरकार आवश्यक नीतिगत व्यवस्था तथा सहजीकरण गर्न तयार रहेको उनको भनाइ छ । 

छलफलमा पत्रकारहरूले पछिल्लो समय विद्युत् ट्रिपिङमा देखिएको समस्यालाई दृष्टिगत गर्दै पूर्वाधार विकासमा जोड दिने नीति पनि ल्याउन सुझाव दिएका थिए । साथै, विद्युतको उत्पादन, प्रसारण र खपतलाई सन्तुलन बनाउनुपर्ने उनीहरूको सुझाव छ । 

यस्तै, विद्युत् विकास नीतिको सफल कार्यान्वयन हुनुपर्ने पनि पत्रकारहरूको जोड छ । सरकारले विगतमा ऊर्जा विकाससम्बन्धी पटक–पटक मार्गदर्शन तथा विभिन्न नीति ल्याए पनि कार्यान्वयन कमजोर छ । तर, अब आउने ऊर्जा विकास नीति सफल रूपमा कार्यान्वयन गर्नुपर्ने उनीहरूको भनाइ छ ।