खेलकुद प्रिन्ट संस्करण

नेपाल फिलिपिन्ससँग पराजित

खेलको ४९औँ मिनेटमा नेपाली खेलाडीको गल्तीमा फिलिपिन्सका जाभियरले एक मात्र विजयी गोल गरे

दक्षिण एसियाली फुटबल (साफ) च्याम्पियनसिपको तयारीस्वरूप फिलिपिन्ससँगको मैत्रीपूर्ण खेलमा नेपाल १–० ले पराजित भएको छ । बिहीबार भएको खेलमा नेपालले घरेलु टोलीलाई चुनौती दिन सकेन । नेपाली खेलाडी अधिकांश समय कमजोर देखिएका थिए । फिफा वरीयतामा आफूभन्दा माथि रहेको फिलिपिन्सलाई नेपालले पहिलो हाफमा गोलरहित बराबरीमा 
रोकेको थियो । 

मलिनास्थित रिजल मेमोरियल रंगशालामा नेपालले खेलको ४९औँ मिनेटमा एक गल्ती गरेको थियो । नेपाली खेलाडीले गरेको गल्तीमा जाभियर गायोसोले फिलिपिन्सलाई १–० को अग्रता दिलाए । खेलमा थप गोल नहुँदा उनकै गोल निर्णायक बन्यो । कप्तान किरणकुमार लिम्बूले कर्नरमा आएको बल फुत्काएपछि गायोसोले सहजै गोल गरे । 

नेपालको डिबक्सभित्र पूजन उपरकोटी, एरिक विष्ट, अनन्त तामाङसहित आधा दर्जन नेपाली खेलाडीलाई जिल्याउँदै गायोसोले सानदार गाल गरे । अहिलेसम्म फिलिपिन्सले नेपाललाई पाँच खेलमा हराएको छ । नेपालले समान एक खेलमा जित र बराबरी नतिजा निकालेको छ । 

विमल र लाकेनको डेब्यु
प्रशिक्षक भिन्सेन्जो अल्बेर्टाे एनेसले फिलिपिन्सविरुद्ध रक्षक विमल पाण्डे र मिडफिल्डर लाकेन लिम्बूलाई डेब्यु गराएका थिए । ‘प्लेइङ सेट’मै मौका पाएका विमल र लाकेनले मैदानमा पूरा समय बिताए । २७ जेठमा सकेको सहिद स्मारक ‘ए’ डिभिजन लिगमा २० वर्षीय लाकेनले थ्री स्टार र ३१ वर्षीय विमलले त्रिभुवन आर्मी क्लबबाट खेलेका थिए । डेब्यु खेलमा दुवैको प्रदर्शन औसत रह्यो । 

लाकेन र विमल पाण्डेसहित अल्बेर्टाेले गोलरक्षक किरण, रक्षकमा अनन्त, सनिस श्रेष्ठ, रोहित चन्द, मिडफिल्डमा एरिक, पूजन, आयुष घलान, अञ्जन विष्ट र नवयुग श्रेष्ठलाई अवसर दिएका थिए । दोस्रो हाफमा दीपकराजसिंह ठकुरी, आभाष लामिछाने, आशिष चौधरी र विमल घर्तीमगरलाई अवसर दिएका हुन् । 

फिलिपिन्सविरुद्ध नेपालले खेलमा दुई अवसर बनायो । पहिलो हाफमा एरिक र दोस्रो हाफमा अनन्त गोल गर्नबाट चुके । तीन हजार समर्थकमाझ फिलिपिन्सले ७० प्रतिशत बल पकड बनाएको थियो । अब नेपाली टोली मलिनाबाट भारत प्रस्थान गर्नेछ । साफ च्याम्पियनसिपको १४औँ संस्करण ६ देखि १८ असारसम्म बेंग्लोरमा हुनेछ । साबिक उपविजेता नेपालले पहिलो खेलमा कुवेतको सामना गर्नेछ ।