१७औँ वार्षिकोत्सव विशेषांकफ्रन्ट पेजमुख्य समाचारसमाचारदृष्टिकोणअर्थअन्तर्वार्ताखेलकुदविश्वफिचरप्रदेशपालिका अपडेट
  • वि.सं २o८o जेठ ५ शुक्रबार
  • Saturday, 22 June, 2024
२o८o जेठ ५ शुक्रबार o८:१३:oo
Read Time : > 1 मिनेट
ad
ad
ad
ad
खेलकुद प्रिन्ट संस्करण

रियलमाथि सानदार जित निकाल्दै सिटी फाइनलमा

साबिक विजेता रियल म्याड्रिडलाई दोस्रो लेगमा ४–० ले स्तब्ध पार्दै म्यानचेस्टर सिटी च्याम्पियन्स लिगको फाइनलमा

Read Time : > 1 मिनेट
नयाँ पत्रिका
२o८o जेठ ५ शुक्रबार o८:१३:oo

इंग्लिस क्लब म्यानचेस्टर सिटीले सर्वाधिक १४ पटकको विजेता रियल म्याड्रिडमाथि दोस्रो लेगमा ४–० को जित निकाली युरोपियन च्याम्पियन्स लिग फुटबल प्रतियोगिताको फाइनलमा स्थान सुरक्षित गरेको छ । सिटीले अब उपाधि भिडन्तमा सिरी ए क्लब इन्टर मिलानविरुद्ध प्रतिस्पर्धा गर्नेछ । प्रतियोगिताकै साबिक विजेतासमेत रहेको रियलले आफ्नो घरेलु मैदानमा सेमिफाइनलको पहिलो लेगमा सिटीलाई १–१ को बराबरीमा रोकेको थियो । प्रतियोगिताको बुधबार राति इतिहाद रंगशालामा सिटीले एकपक्षीय खेल देखायो । 

स्पेनिस क्लब रियलका खेलाडीले खेलको कुनै पनि समयमा सिटीलाई दबाब राख्न सकेन । सिटीको जितमा बर्नाडो सिल्भाले दुई गोल गरेका थिए । म्यानुयल एकान्जी र जुलियन अल्भारेजले रियलको पोस्टमा समान एक गोल गरे । खेलको २३औँ मिनेटमा सिल्भाले सिटीलाई १–० को अग्रता दिलाए । उनले केभिन डी ब्रुयनाको पासमा गोल गरेका थिए । खेलको ३७औँ मिनेटमा सिल्भाले व्यक्तिगत दोस्रो गोल गर्दा सिटी २–० ले अगाडि बढ्यो । 

खेलको ७६औँ मिनेटमा म्यानुयलले सिटीलाई ३–० को बलियो स्थितिमा पुर्‍याए । खेलको अन्तिम इन्जुरी समयमा अल्भारेजले सिटीलाई ४–० को सानदार जित दिलाए । यसअघि इंग्लिस क्लब म्यानचेस्टर सिटी दुई संस्करणको सेमिफाइनलमा रियलसँग पराजित भएको थियो । उत्कृष्ट फर्ममा रहेको सिटीले यसपटक रियललाई खेलमा फर्कन मौका नै दिएन । सिटी सन् २०२०–०२१ को सिजनमा फाइनलमा पुगे पनि चेल्सीसँग पराजित भएको थियो । 

पेप ग्वार्डिओलाको प्रशिक्षणमा रहेको सिटी चालू सिजनमा तीन प्रमुख उपाधिनजिक पुगेको छ । सिटी प्रिमियर लिग र एफए कपको उपाधिनजिक छ । सिटीले एफए कपको फाइनलमा म्यानचेस्टर युनाइटेडसँग खेल्दै छ । सिजनमा तीनै उपाधि जिते सिटी ट्रेबल गर्ने दोस्रो इंग्लिस क्लब हुनेछ । यसअघि सन् १९९९ मा म्यानचेस्टर युनाइटेडले पहिलोपटक ट्रेबल जितेको थियो । त्यसवेला युनाइटेडका प्रशिक्षक सर एलेक्स फर्गुसन थिए । 

च्याम्पियन हुने प्रतीक्षामा 
इंग्लिस क्लब पुनः एकपटक युरोपियन च्याम्पियन्स लिग उपाधिको जितनजिक पुगेको छ । यसपटक फर्ममा रहँदा सिटीले युरोपकै नम्बर एक टोली हुने दाबेदारी बलियो रूपमा दिएको छ । बार्सिलोनालाई च्याम्पियन्स लिग उपाधि दिलाएका पेपले सिटीलाई एकपटक मात्र उपविजेता बनाए । सन् २०२१ को सिजनमा सिटी चेल्सीसँग स्तब्ध भएको थियो । सिटीको प्रतिद्वन्द्वी इन्टर मिलान अनुभवी क्लब हो । इन्टर मिलानले तीनपटक उपाधि उचालेको छ ।

 सन् १९६४, १९६५ र २०१० को सिजनमा इन्टरले च्याम्पियन्स लिग जितेको थियो । सन् १९६७ र ७२ मा इन्टर मिलान उपविजेता बनेको थियो । सेमिफाइनलबाट बाहिरिएको रियल अहिलेसम्मकै सर्वाधिक सफल क्लब हो । म्याड्रिडले कीर्तिमानी रूपमा १४ पटक उपाधि हात पारेको छ । म्याड्रिड चारपटक मात्र उपविजेता बन्यो । च्याम्पियन्स लिगमा एसी मिलानले सातपटक उपाधि जितेको छ । 
 

ad
ad
ad
ad