- वि.सं Invalid date format
नेपाल उद्योग वाणिज्य महासंघको २९ चैतमा हुन लागेको निर्वाचनका लागि वरिष्ठ उपाध्यक्षका प्रत्याशी अञ्जन श्रेष्ठले औपचारिक रूपमा आफ्नो प्यानल घोषणा गरेका छन् । बुधबार काठमाडौंमा आयोजित घोषणासभामा आफ्नो समूहको वाचापत्र (घोषणापत्र) समेत सार्वजनिक गरेका छन् ।
अञ्जनको प्यानलबाट जिल्ला–नगर उपाध्यक्षमा अरुणराज सुमार्गी र वस्तुगत उपाध्यक्षमा मनीषलाल प्रधान उम्मेदवार रहेका छन् । एसोसिएट उपाध्यक्षतर्फ भरतराज आचार्य अञ्जन र उमेशलाल श्रेष्ठको सर्वसम्मत उम्मेदवार भएका छन् । घोषणा कार्यक्रममा वरिष्ठ उपाध्यक्षका प्रत्याशी अञ्जनले वाचापत्र सार्वजनिक गर्दै जीवन्त, जिम्मेवार र जोसिलो निजी क्षेत्रका लागि आफूले उम्मेदवारी दिएको बताए ।
स्थानीय उत्पादनको प्रवद्र्धन गर्दै औद्योगिक विकासमा अगाडि बढ्नुपर्ने उनको भनाइ थियो । नेपालजस्तो मुलुकमा कुनै पनि व्यवसाय टिकाउनका लागि व्यवसाय विस्तार गर्न जरुरी रहेको भन्दै उनले निजी क्षेत्रको नेतृत्वले साना र मझौला व्यवसायीको समस्यालाई समेत सम्बोधन गरेर सँगै अगाडि बढ्नुपर्ने बताए ।
महासंघलाई नयाँ उचाइमा पुर्याउन र संस्थाको व्यावसायिक क्षमता अभिवृद्धिका साथै संस्थागत प्रभावकारिता बढाउन आफ्नो वाचापत्रलाई आधार मानेर काम गर्ने अञ्जनले स्पष्ट पारे । ‘हाम्रो टिमले सहभावना र सहकार्यको मूल आधारलाई लिएर अगाडि बढ्ने र हरेक उद्योग व्यवसायीलाई महासंघमा पहिचान दिलाउने प्रतिबद्धता जाहेर गर्छौँ,’ उनले भने ।
अञ्जन श्रेष्ठ समूहसँग सहकार्य गर्दै एसोसिएट्सतर्फ उपाध्यक्ष पदमा स्वतन्त्र प्यानलबाट उम्मेदवारी दिएका भरतराज आचार्यले सामूहिकतामा विश्वास गर्ने हुँदा सोहीअनुसार सहकार्य गरिएको बताए । यो प्यानलबाट वस्तुगत समूह तथा जिल्ला÷नगरतर्फका केन्द्रीय सदस्यका उम्मेदवारहरूले समेत आफ्नो उम्मेदवारी औपचारिक रूपमा घोषणा गरे ।
