मुख्य समाचार डिजिटल संस्करण

राष्ट्रिय सभा सदस्यहरूको गुनासो– हाम्रो हैसियत वडा सदस्यसरह पनि भएन

राष्ट्रिय सभा सांसदहरूले आफूहरू मर्यादा क्रममा पार्टीभित्र र बाहिर दोस्रो दर्जाको सांसदजस्तो भएको गुनासो गरेका छन्। बिहीबार राष्ट्रिय सभाअन्तर्गतको दिगो विकास तथा सुशासन समिति बैठकमा सांसदहरूले मर्यादा क्रमप्रति असन्तुष्टि जनाएका हुन्।

उनीहरूले पार्टीभित्र प्रतिनिधिसभा सदस्य र राष्ट्रिय सभा सदस्यलाई दिने मान्यतामा धेरै फरक रहेको बताए। राष्ट्रिय सभा सदस्य नारायणप्रसाद दाहालले पार्टीभित्र संसदीय दलको बैठक बस्दा दोस्रो दर्जाको सांसदजस्तो हुने गरेको बताए। राज्यले दिएको मर्यादा र स्वयं व्यक्तिले पाउने मर्यादासमेत नपाएको उनको गुनासो छ।

सांसद विमला घिमिरेले राष्ट्रिय सभा सदस्यमा गृह मन्त्रालयले बनाएको मर्यादाक्रम सच्याउनुपर्ने बताइन्। उनले माथिल्लो सदनको सांसद तल बस्ने तर भर्खरै निर्वाचित भएको भनेर प्रतिनिधिसभा सांसदलाई माथि राख्न नमिल्ने बताइन्।

सांसद शारदादेवी भट्टले राष्ट्रिय सभाका सांसदले कुनै अधिकार नपाएको बताइन्। उनले राष्ट्रिय सभामा बोलेका र समितिमा छलफल भएका कुनै पनि विषय कतै कार्यान्वयनमा नआएको गुनासो गरिन्। उनले राष्ट्रिय सभाका सांसदले संसदमा बोल्ने काम मात्रै भएको बताइन्।

त्यस्तै, सांसद सिंगबहादुर विश्वकर्माले राष्ट्रिय सभाका सदस्यको हैसियत वडा सदस्य जत्तिको समेत नभएको बताए।