अर्थ डिजिटल संस्करण

नवलपरासी पश्चिममा धान उत्पादन ४५ प्रतिशतले वृद्धि

नवलपरासी (बर्दघाट सुस्ता पश्चिम)मा यस वर्ष धान उत्पादनमा ४५ प्रतिशतले वृद्धि भएको छ। गत वर्षको तुलनामा यस वर्ष करिब २८ हजार नाै सय ७३ मेट्रिक टन धान बढी उत्पादन भएको कृषि ज्ञान केन्द्र परासीले जनाएको छ। 

यस वर्ष जिल्लामा २० हजार पाँच सय हेक्टरमा धानखेती गरिएकोमा ९३ हजार दुई सय ७५ मेट्रिक टन धान उत्पादन भएको कृषि ज्ञान केन्द्र परासीका निमित्त प्रमुख सन्तोष चौधरीले  जानकारी दिए। ‘यो वर्ष प्रतिहेक्टर ४.५५ मेट्रिक टनका दरले धान उत्पादन भएको तथ्यांक संकलन गरेका छौँ,’ चौधरीले भने, ‘गत वर्ष जिल्लामा ६४ हजार तीन सय दुई मेट्रिक टन धान उत्पादन भएको थियो ।’

यस वर्षको साउन महिनाको खडेरीले धानमा क्षति पुगे पनि त्यसपछि नियमित पानी परेकाले धानमा क्षति हुन नपाएको चौधरीको भनाइ छ। रामग्राम नगरपालिका, सरावल, पाल्हीनन्दन गाउँपालिका, सुनवलका केही भाग र बर्दघाट नगरपालिका धानको पकेट क्षेत्रको रूपमा चिनिन्छ ।

प्रतापपुर र सुस्ता गाउँपालिका उखु, केरा र बदामका लागि उपयुक्त मानिन्छ। जिल्लामा हाइब्रिड, साँवा, सुगन्धितलगायत जातका धान लगाउने गरिन्छ। धान प्रवर्द्धनका लागि गुणस्तरीय वीजवृद्धि कार्यक्रम, मसिना धानका कार्यक्रम सञ्चालन, सिँचाइका लागि पचास प्रतिशत अनुदानमा यन्त्र उपकरण वितरण, गुणस्तरीय बिउमा जोड दिनेलगायतका कार्यक्रम सञ्चालन गर्ने गरिएको कृषि ज्ञान केन्द्र परासीका सूचना अधिकारी समीर मगरले जानकारी दिए।

‘अनुकूल मौसम, रोगको प्रकोपमा कमी, किसानमा व्यवस्थापन र सचेतनामा वृद्धि, गुणस्तरीय बिउको प्रयोग, मलखादको व्यवस्थापनलगायतका कारण धान उत्पादनमा वृद्धि भएको हो,’ सूचना अधिकारी मगरले भने, ‘रासायनिक मलको अभाव देखिए पनि कृषि सामग्रीमार्फत केही हदसम्म मलखाद आएको र खुला सीमानाकाका कारण किसानले वैकल्पिक माध्यमबाट मलखाद व्यवस्थापन गरेकाले पनि धान उत्पादनमा वृद्धि भएको हो ।’