- वि.सं Invalid date format
चितवन राइनोजले नेपाल प्रिमियर लिग (एनपिएल)को दोस्रो संस्करणका लागि कलाम अलीलाई मुख्य प्रशिक्षकमा नियुक्त गरेको छ । चितवनले अलीलाई मुख्य प्रशिक्षकमा नियुक्त गरेको शनिबार सोसल मिडियामा जानकारी दिएको हो । एनपिएलको पहिलो संस्करणमा चितवनको मुख्य प्रशिक्षकमा उमेश पटवाल र अली सहायक प्रशिक्षक थिए । अली अहिले बागमती प्रदेश क्रिकेट टोलीको प्रशिक्षकका रूपमा कार्यरत छन् ।
पहिलो संस्करणमा प्लेअफसम्मको यात्रा तय गरेको चितवनले गत साता आफ्नो लोगो परिवर्तन गरेको थियो । पहिलो संस्करणको एनपिएलमा चितवन इलिमिनेटर खेलमा कर्णाली याक्ससँग पराजित हँुदै चौथो स्थानमा रहेको थियो । अली नेपाली राष्ट्रिय टोलीका पूर्वक्रिकेटर हुन् । उनीले एनपिएल अलावा घरेलु क्रिकेटमा विभिन्न टोलीका लागि यसअघि पनि प्रशिक्षक रहिसकेका छन् । अलीले एभरेस्ट प्रिमियर लिगमा पञ्चकन्या काठमाडौं किंग्स इलाभेनको प्रशिक्षकका रूपमा काम गरेका थिए ।
ज्ञानेन्द्र मल्ल नेपाल ‘ए’ टोलीका प्रमुख प्रशिक्षक हुँदा अली सहायक प्रशिक्षक थिए । उनले नेपालको महिला यू–२० टोलीको पनि प्रशिक्षक गरेका थिए । चितवनले मार्कीसमेत रहेका कप्तान कुशल मल्ललाई रिटेन गरेको छ । यसैगरी, रिजन ढकाल, कमलसिंह ऐरी, दीपक बोहोरा, अमरसिंह राउटेला र गौतम केसीलाई दोस्रो संस्करणका लागि रिटेन गरेको छ । एनपिएलको मिनी अक्सन अर्को शनिबार हुनेछ ।
