सरकारले रुसको ग्यासमाथिको निर्भरतालाई कम गर्ने उपायको खोजी गरिरहेको इटालीका प्रधानमन्त्री म्यारियो ड्राघीले मंगलबार इटलीको संसदलाई जानकारी गराएका छन् ।
रुस–युक्रेनबीचको सैन्य द्वन्द्वका कारण युरोपमा इन्धनको मूल्य वृद्धि हुने अनुमान भइरहेका समय इटालीले रुसी इन्धनको विकल्पबारे अध्ययन गरिरहेको प्रधानमन्त्री ड्राघीले बताएका हुन् । सरकारले सम्भावित इन्धन संकटबाट आउने अवस्थासँग जुझ्न निरन्तर अध्ययन गरिरहेको उनले बताएका छन् ।
युक्रेनमा रुसले आक्रमण गरेसँगै इटालीलगायतका युरोपेली मुलुकमा इन्धनको मूल्य आकासिएको छ । इटालीको राष्ट्रिय तथ्यांक कार्यालयका अनुसार इटलीमा प्राकृतिक ग्यासको मूल्यमा डिसेम्बरमा २९.१ प्रतिशतले बढेकोमा जनवरीमा यसमा थप वृद्धि भई ३८.६ प्रतिशत पुगेको छ । प्रारम्भिक तथ्यांकहरूले इन्धनको मूल्य आगामी दिनमा थप बढ्ने प्रक्षेपण गरेका छन् ।
ड्राघीका अनुसार इटालीले प्रयोग गर्ने प्राकृतिक ग्यासमध्ये ९५ प्रतिशत विदेशबाट ल्याइन्छ भने यसको ४० प्रतिशत रुसबाट आपूर्ति हुने गर्दछ । उनले भने, ‘रुसबाट आयात हुने ग्यासमा कुनै अवरोध नआउने विश्वास व्यक्त गर्दै कुनै हालतमा आपूर्ति रोकिएमा यसको वैकल्पिक व्यवस्था गर्न सरकारले गृहकार्य थालेको छ ।
इटालीमा बढ्दो गर्मीसँगै न्यानोका लागि प्रयोग गरिने ग्यासको मागमा कमी आउने बताइएको छ । इटालीसँग अहिले २५ अर्ब क्युविक मिटर ग्यास भण्डारण अवस्थामा रहेको छ । रासस
