भक्तपुरमा सवारी दुर्घटना हुँदा स्कुटरचालकको मृत्यु भएको छ ।
मध्यपुरथिमि नगरपालिका– ९, राधेराधेका २९ वर्षीय राजु तामाङको दुर्घटनामा परी मृत्यु भएको हो ।
गएराति भक्तपुरबाट काठमाडौंतर्फ बा.७३प ३८२ नम्बरको स्कुटर चढेर जाँदै गर्दा आफैँ अनियन्त्रित भई दुर्घटना भएको थियो ।
महानगरीय प्रहरी परिसर भक्तपुरका प्रवक्ता डिएसपी दीपक गिरीका अनुसार दुर्घटनामा गम्भीर घाइते बनेका तामाङलाई उपचारका लागि मध्यपुर अस्पताल लगिएको थियो ।
त्यहाँ उपचार सम्भव नभएपछि थप उपचारका लागि नर्भिक अस्पताल पुऱ्याइएको थियो ।
उपचारकै क्रममा उनको मृत्यु भएको डिएसपी गिरीले जानकारी दिए ।
दुर्घटनाका विषयमा थप अनुसन्धान भइरहेको प्रहरीले जनाएको छ ।
