भारतमा विगत २४ घन्टामा कोरोना भाइरसबाट थप ४३ हजार आठ सय ९३ जना नयाँ संक्रमित भेटिएका छन् । योसहित भारतमा कुल संक्रमितको संख्या ७९ लाख ९० हजार पुगेको छ ।
भारतीय स्वास्थ्य तथा परिवार कल्याण मन्त्रालयका अनुसार भारतमा हाल ६ लाख १० हजार आठ सय तीनजना सक्रिय संक्रमित अवस्थामा रहेका छन् । पछिल्लाे २४ घन्टामा पाँच सय आठजनाको संक्रमणबाट मृत्यु भएको छ ।
भारतमा कोभिड– १९ को संक्रमणबाट मृत्यु भएका व्यक्तिको संख्या एक लाख २० हजार १० पुगेको छ ।
मन्त्रालयले भारतमा कुल जनसंख्यामा संक्रमित हुने व्यक्तिको अनुपात विश्वमै सबैभन्दा न्यून रहेको पनि जनाएको छ ।
साथै कोरोना संक्रमितको मृत्यु हुने औसत दरसमेत विश्वका अन्य मुलुकको भन्दा कम रहेको मन्त्रालयले जनाएको छ ।
यसैगरी विश्वमा प्रतिदश लाख जनसंख्यामा औसतमा एक सय ४३ जनाको मृत्यु भइरहेकाे छ । जसअन्तर्गत भारतमा ८४, रसियामा एक सय ६९, फ्रान्समा पाँच सय ११, बेलायतमा ६ सय ४४ र संयुक्त राज्य अमेरिकामा ६सय ६० जनाको मृत्यु भएको छ ।
भारतको महाराष्ट्र राज्य कोरोना संक्रमणको सबैभन्दा उच्च जोखिममा छ । यहाँ अझै पनि एक लाख ३२ हजार व्यक्ति सक्रिय संंक्रमित रहेका छन् ।
यहाँ ४३ हजार चार सय ६३ जनाको मृत्यु भइसकेको छ भने १४ लाख ७८ हजार व्यक्ति निको भएका छन् ।
भारतीय स्वास्थ्य अनुसन्धान परिषद्ले हालसम्म १० करोड ५४ लाख ८७ हजारको नमुना परीक्षण गरेको जनाएको छ । हिजो मात्रै १० लाख ६६ हजार सात सय ९६ जनाको नमुना परीक्षण गरेको जनाएको छ ।
