बर्दिया- बर्दियाको बढैयाताल गाउँपालिका–८, शीतलबजारस्थित भे १४ प ८६२४ नम्बरको मोटरसाइकल आफैँ अनियन्त्रित भई दुर्घटना हुँदा एक जनाको मृत्यु भएको छ भने एक जना गम्भीर घाइते भएका छन्।
दुर्घटनामा परेर मोटरसाइकल चालक बाँकेको कोहलपुर नगरपालिका–९ बस्ने वर्ष २० का दिक्षित श्रेष्ठ र मोटरसाइकलको पछाडि सवार सोही स्थान बस्ने वर्ष १६ का रिदम थापा घाइते भएका थिए।
घाइते भएका दुवै जनालाई उपचारका लागि नेपालगञ्जस्थित सञ्जीवनी अस्पताल मेडिकल साइन्स कलेज पठाइएकोमा प्रारम्भिक उपचारपश्चात् थप उपचारका लागि भारतको लखनउ लगिएको थियो। उपचारकै क्रममा आज बिहान चिकित्सकले रिदम थापालाई मृत घोषणा गरेका थिए।
मोटरसाइकल चालक दिक्षित श्रेष्ठको शरीरका विभिन्न भागमा चोट लागी अवस्था गम्भीर रहेको छ। घटनाबारे थप अनुसन्धान भइरहेको प्रहरीले जनाएको छ।
