दसैँलक्षित लामो दूरीका सार्वजनिक यातायातको अग्रिम टिकट बुकिङ खुलाको निर्णय गर्न आज (मंगलबार) यातायात व्यवस्था विभागमा बैठक बस्दै छ । नेपाल यातायात व्यवसायी राष्ट्रिय महासंघका महासचिव डेकनाथ गौतमका अनुसार बिहान ११ बजे बस्ने बैठकले अग्रिम टिकट बुकिङ खुलाउने निर्णय गर्नेछ । ‘असोज २२ वा २३ गते (बिहीबार वा शुक्रबार)बाट अग्रिम टिकट बुकिङ खुलाउने तयारी छ,’ उनले भने ।
यातायात व्यवस्था विभाग, यातायात व्यवसायी, मजदुर संगठन, ट्राफिक प्रहरीसहित सरोकारवाला निकायबिच बैठक बसेर अग्रिम टिकट खुलाउँदै आएको छ । यसअघिका वर्षमा घटस्थापनाभन्दा कम्तीमा १५ दिनअघि अग्रिम टिकट खुलाउने गरिन्थ्यो ।
यसपटक पनि विभागले टिकट खुलाउन व्यवसायीलाई आग्रह गरेको थियो । तर, असोज दोस्रो साताको बाढीपहिरोबाट देशका ठुला राजमार्ग अवरुद्ध/आंशिक अवरुद्ध भएपछि व्यवसायीले सडक पूर्ण रूपमा सुचारु भएपछि मात्र खोल्ने जवाफ फर्काएका थिए । हाल राजमार्ग पूर्ण रूपमा सुचारु भएपछि अग्रिम टिकट बुकिङ खुलाउन थालिएको हो । यसपटक २५ असोजमा घटस्थापना छ । दसैँमा थातथलो फर्किने भएकाले काठमाडौंसहितका सहर छाड्नेको संख्या अत्यधिक हुन्छ । जसकारण यात्रुको चाप उच्च हुन्छ । यसपालि २५ असोजमा घटस्थापना, ३१ असोजमा फूलपाती र ४ कात्तिकमा टीका छ । अध्ययन तथा रोजगारीका लागि विदेश र देशका विभिन्न ठाउँमा गएका व्यक्ति दसैँ मान्न घटस्थापनाआसपासको समयदेखि फर्कने गर्छन् । त्यसले गर्दा अघिपछिभन्दा यो समयमा यात्रुको चाप उच्च हुन्छ । त्यसलाई सही ढंगले व्यवस्थापन गर्न दसैँमा सार्वजनिक यातायातको अग्रिम टिकट बुकिङ खुला गर्ने अभ्यास छ ।
अनलाइन बुकिङको पनि सुविधा
नेपाल यातायात व्यवसायी राष्ट्रिय महासंघका अनुसार अनलाइनबाट अग्रिम टिकट बुकिङको सुविधा दिने तयारी छ । अहिले अधिकांश कम्पनी अनलाइनबाटै टिकट काट्न सकिने बससेवालगायत प्लाटफर्ममा जोडिएका छन् । त्यस्ता प्लाटफर्मबाट अग्रिम रूपमा टिकट काट्न मिल्ने गरी व्यवस्था गरिने महासंघका महासचिव डेकनाथ गौतमले बताए ।
‘अधिकांश यातायात कम्पनी अनलाइटबाट टिकट काट्न मिल्ने प्लाटफर्ममा जोडिएका छन् । हामीले सेवाप्रदायक यायायात कम्पनीलाई अनलाइनबाट टिकट काट्न मिल्ने सुविधालाई उच्च प्राथमिकतामा राख्न भनेका छौँ,’ उनले भने, ‘यो सुविधा हुन्छ नै । तर, यसका लागि सरकारले कार्यविधि ल्याउने भने पनि अझै आउन सकेको छैन । कार्यविधि आउन सकेको भए थप प्रभावकारी हुने थियो ।’
