विपक्षी दलहरूको बहिष्कारबिच मुख्यमन्त्री थापालाई विश्वासको मत

बागमती प्रदेशका मुख्यमन्त्री किरण थापामगरले प्रदेश सभाका विपक्षी दलहरूको बहिष्कारबिच विश्वासको मत प्राप्त गरेका छन्। विपक्षी दलहरूले प्रक्रिया नै असंवैधानिक भएको आरोप लगाउँदै बैठक बहिष्कार गरेपछि उपस्थित सत्तापक्षीय सांसदहरूको मतबाट मुख्यमन्त्री थापाले विश्वासको मत हासिल गरेका हुन्।

मंगलबार बसेको प्रदेश सभा बैठकमा मुख्यमन्त्री थापाले प्रस्तुत गरेको विश्वासको मतसम्बन्धी प्रस्तावको पक्षमा उपस्थित सबै ५७ सांसदले मतदान गरे। प्रस्तावको विपक्ष वा तटस्थमा कुनै मत परेन।

१०४ सदस्यीय बागमती प्रदेश सभामा सरकार टिकाउन कम्तीमा ५३ मत आवश्यक पर्छ। मुख्यमन्त्री थापाले आवश्यक बहुमतभन्दा चार मत बढी प्राप्त गर्दै विश्वासको मत सुरक्षित गरेका हुन्।

विश्वासको मतका क्रममा प्रदेश सभामा सत्तारूढ गठबन्धनका सांसदहरू मात्र उपस्थित थिए। प्रमुख प्रतिपक्षी नेपाली कांग्रेसका ३६, नेपाल मजदुर किसान पार्टी (नेमकिपा)का ३ र हाम्रो नेपाली पार्टीका २ सांसदले बैठक बहिष्कार गरे। सत्तासाझेदार राष्ट्रिय प्रजातन्त्र पार्टी (राप्रपा)का पाँच सांसद पनि बैठकमा अनुपस्थित रहे।

मुख्यमन्त्री थापाले एमालेका २५, नेकपाका २६ र राप्रपाका ७ सांसदको समर्थन प्राप्त गरेका हुन्। एमालेका २६ सांसदमध्ये उपसभामुख अप्सरा चापागाईंले बैठकको अध्यक्षता गरेका कारण मतदानमा सहभागी भइनन्। संविधानअनुसार बैठकको अध्यक्षता गर्ने व्यक्तिले मत बराबर भएको अवस्थामा बाहेक मतदान गर्न मिल्दैन।

विपक्षी दलहरूले मुख्यमन्त्री नियुक्तिसम्बन्धी मुद्दा उच्च अदालत पाटनको हेटौँडा इजलासमा विचाराधीन रहेकाले विश्वासको मत लिनु संविधानको भावनाविपरीत भएको दाबी गर्दै बैठक बहिष्कार गरेका थिए।