भूकम्प प्रभावितको सहयोगका लागि चीन सरकारले पठाएको २८ करोड रुपैयाँ (१५ लाख चिनियाँ मुद्रा)बराबरको राहत सामग्री बुधबार पोखरा आइपुगेको छ । चिनियाँ जनमुक्ति सेनाको दुई कार्गो जहाज सिचुआनको छेन्दुबाट राहत सामग्री लिएर पोखरा अन्तर्राष्ट्रिय विमानस्थलमा अवतरण गरेका थिए । पोखरामै चिनियाँ राजदूत चेन सोङले उपप्रधानमन्त्री एवंं गृहमन्त्री नारायणकाजी श्रेष्ठलाई राहत सामग्री हस्तान्तरण गरे ।
भूकम्पलगत्तै चीनले नेपाललाई १० करोडबराबरको राहत सामग्री प्रदान गर्ने घोषणा गरेको थियो । उक्त राहत सामग्री मंगलबार आइसकेको छ । बुधबार पनि चीनले केरुङ नाकाबाट थप १० करोड रुपैयाँबराबरका राहत सामग्री पठाएको छ । पोखरामा सैन्य जहाजले ल्याएको सामग्री विगतमा घोषणा गरेको भन्दा बेग्लै हो ।
चिनियाँ दुई जाहाज बिहान ९:३० बजे पोखरा अन्तर्राष्ट्रिय विमानस्थलमा अवतरण गरेका थिए । विमानस्थलमा आयोजित कार्यक्रममा राजदूत सोङले उपप्रधानमन्त्री एवं गृहमन्त्री श्रेष्ठलाई चार हजार ६ सय थान कम्बल र उच्च गुणस्तरका ६ सय थान टेन्ट हस्तान्तरण गरेका थिए । ती सामग्रीको तौल एक लाख ७९ हजार केजी छ । चीनले प्रदान गरेका ती सामग्री सशस्त्र प्रहरीले पोखराबाट ट्रकमार्फत भूकम्प प्रभावित क्षेत्र जाजरकोट र रुकुम पश्चिम लाने भएको छ ।
सहयोग सामग्री बुझेपछि उपप्रधानमन्त्री श्रेष्ठले चीनले प्रदान गरेको सामग्रीमध्ये कम्बल भूकम्प प्रभावित सर्वसाधारणलाई तत्कालै वितरण गरिने बताए । प्राप्त टेन्टहरू सरकारी कार्यालयहरू, पालिकाका कार्यालयहरू, स्वास्थ्य कार्यालयहरू, नेपाली सेना, नेपाल प्रहरी, सशस्त्र प्रहरीलगायत अन्य कार्यालयहरू सञ्चालनका लागि प्रयोग गरिने उनले बताए ।
नेपाललाई संकटसँगै दुःख पर्दा चीनले सधैँ साथ र सहयोग दिने गरेको भन्दै श्रेष्ठले चीनले आउँदा दिनमा समेत आवश्यक सहयोग गर्ने वचन दिएको बताए । नेपाल र चीनको सम्बन्ध निकै पुरानो रहेको भन्दै श्रेष्ठले ०७२ को भूकम्पसँगै तथा कोरोनाको समयमा चीनले गरेको सहयोगको स्मरण गरे ।
राजदूत सोङले दुःखका समय नेपाली जनता र नेपाल सरकारसँग चीन सधैँ साथमा साथ दिन तयार रहेको बताए । नेपालमा भूकम्पले गरेको क्षतिको जानकारी पाएसँगै राष्ट्रपति सी जिनपिङले दुःख व्यक्त गरेको भन्दै उनले चीन सरकार नेपालको सुख–दुःखमा सधैँ साथ दिन तयार रहेको बताए ।
