फिल्ममा पैसा हाले राम्रो आम्दानी हुने प्रलोभन देखाउँदै नयाँ–नयाँ लगानीकर्तालाई ‘मुर्गा’ बनाउने नेपाली फिल्म क्षेत्रमा पुरानै प्रवृत्ति हो । यही प्रवृत्तिका कारण आफू ठगिएको भन्दै निर्माता केशव पाण्डे अहिले न्याय माग्दै प्रहरी हुँदै अदालतको शरणसम्म पुगेका छन् ।
१६ असारमा आयोजित फिल्म ‘प्रसाद २’ निर्माणको भव्य घोषणासभामा पाण्डेलाई फिल्म निर्माताको परिचय गराइएको थियो । यो फिल्मको कुनै पनि प्रचार सामग्रीमा पाण्डेको नाम छैन । फिल्म रिलिजको चरणमा पुग्दा चलचित्र विकास बोर्डले समेत आफूलाई अन्याय गरेको भन्दै पाण्डे फिल्म प्रदर्शन रोक्न अदालत पुगेका छन् ।
मंगलबार उच्च अदालत पाटनले अर्को छलफलबाट निर्णय नभएसम्म फिल्मको प्रदर्शन नगर्न अल्पकालीन अन्तरिम आदेश जारी गरेको छ । २४ चैतमा रिलिज मिति तोकिएको यो फिल्मका लागि आफूले गरेको लगानीको हिसाबकिताब नभएसम्म रिलिज रोक्न अन्तरिम आदेशको माग गरेका थिए ।
न्यायाधीश सुदर्शनराज पाण्डेको एकल इजलासले आगामी २६ चैतलाई अर्को पेसी तोक्दै दुवै पक्षलाई छलफलका लागि बोलाएको छ । ‘आदेशमा के–कति कारणले अन्तरिम आदेश नदिनुपर्ने हो भनेर विपक्षीलाई आधार, कारण र प्रमासहित लिखित जवाफको मागसमेत गरिएको छ,’ उच्च अदालत पाटनकी प्रवक्ता उपराजिस्ट्रार मन्दिरा शाहीले भनिन्, ‘२६ चैतमा दुवै पक्षलाई छलफलमा बोलाइएको छ । छलफलबाट निर्णय नभएसम्म फिल्म प्रदर्शन नगर्नु–नगराउनु भनी अल्पकालीन अन्तरिम आदेश जारी भएको छ ।’ अदालतमा निवेदक पाण्डेका तर्फबाट अधिवक्ताहरू सरोज अधिकारी, अरुण पौडेल र श्यामकुमार विश्वकर्माले बहस गरेका थिए ।
मंगलबार चलचित्र विकास बोर्डको पहलमा दिउँसो ४ बजेतिर ‘प्रसाद–२’ टिम फिल्म सेन्सरका लागि सेन्सर बोर्ड पुगिसकेको थियो । फिल्म सेन्सर प्रक्रिया चलिरहेकै वेला प्राविधिक संघको आपत्ति र अदालतबाट स्टे अर्डरको खबर आएपछि फिल्मको सेन्सरसमेत रोकिएको छ ।
विवादको अन्तर्य के हो ?
करिब दुई वर्षअघि साथीमार्फत ‘प्रसाद’का निर्माता सुवास थापासँग पाण्डेको परिचय भएको थियो । त्यसको एक वर्षपछि चिनजान बाक्लिँदै जाँदा मेडिकल व्यवसायी रहेका पाण्डेको आर्थिक आम्दानीबारे थापाले पत्तो पाए । फिल्म निर्माण गर्दा नाम पनि हुने, राम्रो कमाइ पनि हुने प्रलोभन देखाउँदै ‘प्रसाद’को सिक्वेल ‘प्रसाद २’ मा लगानी गर्न प्रस्ताव राखे । ‘विश्वासिलो साथी पनि जोडिएकाले मैले सोझो पारामा विश्वास गरेर लगानी गर्न तयार भएँ,’ निर्माता पाण्डे भन्छन्, ‘दुवैजनाले बराबर लगानी गर्ने सहमति थियो । त्यसपछि थापाले पैसा माग्दै गए, मैले पटक–पटक गरेर फिल्म सुटिङमा जानुअघि नै ६२ लाख ५० हजार रुपैयाँ दिएँ । जब फिल्म छायांकनका लागि कास्कीको ल्वाङघले पुग्यो, त्यसपछि पो पत्तो पाएँ– म त ठगिएछु, मुर्गा पो भएछु ।’
पाण्डेका अनुसार छायांकनमा पुग्दासम्म उनको तर्फबाट लगानी भएको रकम सबै सकियो । सुटिङ निरन्तरताका लागि त्यहाँ थप रकमको आवश्यकता प¥यो । सहमतिअनुसार पाण्डेले जति रकम लगानी गरे, अब त्यति नै रकम थापाको तर्फबाट लगानी हुनुपर्ने थियो । ‘तर, उहाँसँग त पैसा नै रहेनछ, अझै मलाई नै हाल्नुस्, म पछि मिलाउँछु पो भन्न थालियो,’ पाण्डे भन्छन्, ‘बाहिर यस्तो हल्ला आएपछि यही विषयलाई लिएर मतभेद भएको थियो । म आफैँ कास्की पुगेपछि मैले आफू ठगिएको थाहा पाएँ । त्यसपछि फिल्मको सुटिङ रोकियो ।’
बीचमै सुटिङ रोकिएर काठमाडौं फर्किएपछि निर्माता थापाले पाण्डेलाई उनको लगानी फिर्ता गर्ने र नयाँ लगानीकर्ता खोजेर फिल्म निर्माणलाई अघि बढाउने सहमति गरे । सहमतिअनुसार पाण्डेलाई पटकपटक गरेर ६२ लाख ५० हजारको चेक थमाए ।
तर, चेकमा तोकिएको अवधिमा पैसा निस्किएन । पाण्डेको हातमा न फिल्म पर्र्यो, न पैसा । पटक–पटक झुक्याएपछि पाण्डेले चलचित्र निर्माता संघ गुहारे । केही नभएपछि पाण्डेले थापाविरुद्ध जिल्ला प्रहरी परिसर टेकुमा चेक अनादरको आरोपमा बैंकिङ कसुरमा जाहेरी दर्ता गरेका छन् ।
प्रहरीमा जाहेरी दिएपछि पनि थापाले पैसा तिर्न एक साताको भाखामा मागे । तर, तिरेनन् । त्यसपछि जाहेरी दर्ता भयो । एक साताअघि उच्च अदालत पाटनबाट थापाविरुद्ध पक्राउ पुर्जीसमेत जारी भइसकेको छ । तर, थापा भने फरार छन् । जिल्ला प्रहरी परिसर टेकुका प्रमुख एसएसपी दानबहादुर कार्कीका अनुसार अहिले थापालाई प्रहरीले खोजिरहेको छ । ‘हामी उनलाई पक्राउका लागि खोजिरहेका छौ’,’ एसएसपी कार्कीले भने ।
थापाले भने नयाँ निर्माताका रूपमा सुदर्शन बस्नेतलाई भित्र्याएर फिल्म तयार गरिसकेका छन् । पाण्डेलगायत थापाले रकम तिर्न बाँकी प्राविधिकलगायतले पनि चलचित्र विकास बोर्डमा उजुरी हालेपछि सोमबार फिल्मको सेन्सर गर्नुअघि बोर्डले सबै पक्षलाई छलफलका लागि बोलाएको थियो । छलफलमा बोर्ड अध्यक्ष भुवन केसी, ‘प्रसाद २’का निर्देशक सुदर्शन थापा, अर्का निर्माता सुदर्शन बस्नेत, वितरक गोपालकाजी कायस्थ, उजुरीकर्ता पाण्डेलगायत उपस्थित थिए । तर, छलफल पीडितको रकम फिर्ता गराउनभन्दा पनि जसरी पनि फिल्म रिलिज गराउनमा केन्द्रित भएपछि असहमति जनाउँदै पाण्डे छलफलबाट बाहिरिए ।
थापाले आफूसँग फिल्म निर्माणका लागि गरेको सहमतिको कम्पनी र चलचित्र विकास बोर्डमा फिल्म दर्ताका क्रममा राखेको कम्पनीसमेत फरक गरेर ठगी गरेको पाण्डेले बताए । ‘मसँग एउटा कम्पनीबाट सहमति गरे, पछि लफडा होला भनेर छोराको नाममा अर्को कम्पनी खोलेर त्यसबाट पो फिल्म दर्ता गरेका रहेछन्,’ उनले भने ।
चलचित्र प्राविधिक संघका अध्यक्ष पुष्कर लामाका अनुसार थापाले प्राविधिकहरूको ११ लाख ६० हजार तिर्न बाँकी छ । यो रकम नतिरेसम्म फिल्मको सेन्सर गर्न नदिने संघको अडान छ । ‘चलचित्र विकास बोर्डसँग सहमतिअनुसार चलचित्र प्राविधिकको पारिश्रमिक नदिईकन कुनै पनि फिल्मको सेन्सर गर्न नदिने परम्परा छ,’ लामाले भने, ‘तर, मंगलबार यो फिल्मको पेलेरै सेन्सर गर्न खोजियो । दबाबका बाबजुद पनि हामी कुनै पनि छलफलमा सहभागी भएनौँ ।’ थापाले सोमबार फेसबुकमा फिल्म प्रदर्शनपछि मात्रै सबैको पैसा तिर्ने स्टाटस लेखेका छन् ।
