वाणिज्य, आपूर्ति तथा उपभोक्ता संरक्षण विभागका महानिर्देशक लीलाप्रसाद शर्माले बजार मूल्यवद्धि सरकारको नियन्त्रणभन्दा बाहिर रहेको बताएका छन् । शनिबार विभागमा पत्रकार सम्मेलन गर्दै वाणिज्य मन्त्रालयको निर्देशनअनुसार देशभर एकसाथ, एकै समय बजार अनुगमन गरिएको विषयमा जानकारी दिँदै उनले यस्तो बताएका हुन् । 

उनले देशैभरि अनुगमन गर्दा विदेशबाट नै सामानको मूल्यवृद्धि भएर आएको देखिएकाले बजारको मूल्यवृद्धि सरकारको नियन्त्रणभन्दा बाहिर रहेको पाइएको बताए । उद्योग, वाणिज्य तथा आपूर्ति मन्त्रालयको बजार अनुगमन गर्ने निर्णयअनुसार देशव्यापी रूपमा असार १७ गते देशभर एकसाथ बजार अनुगमन गरिएको थियो । आगामी दिनमा यस्तो अनुगमनलाई निरन्तरता दिइने विभागले बताएको छ ।