राष्ट्रिय प्रजातन्त्र पार्टी (राप्रपा)ले पेट्रोलियम पदार्थको मूल्यवृद्धि गर्नाको कारण माग गर्दै नेपाल आयल निगमको कार्यालयमा धर्ना दिएको छ। सोमबार निगमको टेकुस्थित केन्द्रीय कार्यालय पुगेका सो पार्टीका नेता, कार्यकर्ताहरूले पेट्रोलियम पदार्थको मूल्यवृद्धि गर्नुको कारण माग गर्दै धर्ना दिएका हुन्।
प्रतिलिटर पेट्रोल, डिजेल र मटितेलको कच्चा पदार्थको मूल्य कति पर्छ ? नेपाल आयल निगमका कर्मचारीको बोनस कति छ ? नेपालका भिभिआइपीलाई वर्षको कति पेट्रोल निःशुल्क उपलब्ध गराइन्छ ? प्रतिलिटर पेट्रोल, डिजेल र मटितेलमा कति कर लाग्छ ? लगायतका सात प्रश्नको जवाफ माग गर्दै उनीहरूले निगम कार्यालयमा धर्ना दिएका हुन्।
अनावश्यक करको दर मात्रै हटाउने हो भने पनि पेट्रोलियम पदार्थको मूल्य आधा घट्न सक्ने पार्टीका प्रवक्ता ज्ञानेन्द्र शाहीले बताए।