जनकपुरबाट भैरहवा आउँदै गरेको बस रुपन्देहीको भैरहवा–परासी सडकखण्डमा पर्ने रोहिणी पुलमा दुर्घटना हुँदा नौजनाको मृत्यु भएको छ । २३ जना घाइते भएका छन् । घाइतेको भैरहवास्थित भीम अस्पताल र मेडिकल कलेजमा उपचार भइरहेको जिल्ला प्रहरी कार्यालय रुपन्देहीका डिएसपी नवरत्न पौडेलले जानकारी दिए ।
आइतबार बिहान करिब साढे ४ बजे बस रोहिणी पुलबाट खोलामा खसेको थियो । दुर्घटनामा परी पाँचजनाको मेडिकल कलेज भैरहवामा र चारजनाको भीम अस्पतालमा मृत्यु भएको प्रहरीले जनाएको छ ।
जनकपुरबाट भैरहवातर्फ आउँदै गरेको लु.२ख ३८४१ नम्बरको बस रोहिणी नदीमा खसेको हो । चालक निदाएकाले बस दुर्घटनामा परेको हुन सक्ने प्रहरीले प्रारम्भिक अनुमान गरेको छ । मृतकको सनाखत हुन सकेकाे छैन । बसमा सवार ३३ जनामध्ये २५ जना पुरुष, ६ महिला र दुई बालिका थिए।