अर्थ डिजिटल संस्करण

नेप्से परिसूचक  ३३ अंकले घट्यो

पछिल्लो एक साता निरन्तर गिरावट हुँदै आएको नेप्से परिसूचक शुक्रबार पनि घटेको छ। नेप्से परिसूचक ३३.७६ अंकले घटेर दुई हजार ७८.७० बिन्दुमा झरेको छ।

सेन्सेटिभ इन्डेक्स ७.१८, फ्लोट इन्डेक्स २.१३ र सेन्सेटिभ फ्लोट इन्डेक्स १.८८ अंकले गिरावट आएको छ। शुक्रबार कारोबारमा आएका २२६ कम्पनीको ३८ लाख ४८ हजार कित्ता सेयर १ अर्ब ३० करोड ७३ लाख रुपैयाँबराबरमा खरिदबिक्री भएको छ।

आज नेप्सेका १३ वटै उपसमूहको परिसूचक ओरालो लागेको छ। जसमध्ये व्यापार र जीवन बिमा उपसमूहको परिसूचक २ प्रतिशतभन्दा बढी घटेको छ भने बैंकिङ, विकास बैंक, वित्त, जलविद्युत्, लगानी, उत्पादन तथा प्रशोधन, लघुवित्त, म्युचुअल फन्ड र निर्जीवन बिमा उपसमूहको परिसूचक १ प्रतिशतभन्दा बढीले घटेको छ।

नेप्सेमा भारी अंकले गिरावट आए पनि कारोबारमा आएका दुई कम्पनीको सेयर मूल्य भने सकारात्मक सर्किट लेभलमा कारोबार भएको छ। जसमा उन्नति सहकार्य लघुवित्त र बलेफी हाइड्रोपावर कम्पनी रहेका छन्। अन्य प्रायः सबै कम्पनीको सेयर मूल्य उच्च अंकले गिरावट आएको छ।

कारोबार रकमका आधारमा ६ करोडभन्दा बढीको सेयर कारोबार गरेर एनआइसी एसिया बैंक शीर्ष स्थानमा रहेको छ। आज नागरिक लगानी कोषको ४ करोडभन्दा बढीको सेयर खरिदबिक्री भएको छ।