- वि.सं Invalid date format
यही वैशाख ३० गते हुने स्थानीय तहको निर्वाचन सम्पन्न गर्न मुख्य निर्वाचन कार्यालय रामेछापले जिल्लाका एक हजार एक सय १२ कर्मचारीलाई खटाएको छ। जिल्लाका दुई नगरपालिका र ६ गाउँपालिकाका ९२ मतदानस्थल र दुई सय २३ मतदान केन्द्रमा मतदान अधिकृत, सहायक मतदान अधिकृत, सहायक कर्मचारी र सहयोगीसमेत गरी आवश्यक कर्मचारी खटाइएको मुख्य निर्वाचन कार्यालय रामेछापका मुख्य निर्वाचन अधिकृत डा. दीवाकर भट्टले जानकारी दिए।
भट्टका अनुसार सदरमुकाम रहेको मन्थली नगरपालिकामा मतदाता संख्या ३७ हजार दुई सय २० रहेकाले सोहीअनुसार दुई सय ३५ कर्मचारी खटाइएको छ। त्यसैगरी कम मतदाता रहेको गोकुलगंगा गाउँपालिकामा एक सय कर्मचारी खटाइएको छ। यसबाहेक उमाकुण्ड गाउँपालिकामा एक सय सात, लिखु तामाकोसी गाउँपालिकामा एक सय ३० र सुनापति गाउँपालिकामा एक सय १५ जना कर्मचारी खटाइएको छ।
यसैगरी, निर्वाचन सम्पन्न गर्न खाँडादेवी गाउँपालिकामा एक सय ३५, दोरम्बा शैलुङ गाउँपालिकामा एक सय ३५ र रामेछाप नगरपालिकामा एक सय ५५ कर्मचारी खटिएका छन्। जिल्लाको दुई नगरपालिका, ६ गाउँपालिका र ६४ वडा गरी कुल तीन सय ३६ पदमा एक हजार दुई सय ५९ उम्मेदवार चुनावी दौडमा होमिएका छन्। रामेछापमा ९१ हजार एक सय ३१ पुरुष र ८७ हजार सात सय ३६ महिला गरी कुल एक लाख ७८ हजार आठ सय ६७ मतदाता रहेका छन्।
