- वि.सं २o८१ जेठ ५ शनिबार
नेपाल उद्योग वाणिज्य महासंघको महानिर्देशकमा गोकर्ण अवस्थी नियुक्त भएका छन् । महासंघको आइतबारको कार्यसमिति बैठकले आइतबारदेखि नै लागू हुने गरी अवस्थीलाई महानिर्देशकमा नियुक्त गरेको एक सदस्यले जानकारी दिए । अवस्थी एक वर्ष तीन महिनादेखि महासंघमा उपमहानिर्देशकका रूपमा कार्यरत छन्।
नवनियुक्त महानिर्देशक अवस्थीले यसअघि संयुक्त राष्ट्र संघको दिगो विकास लक्ष्यको सल्लाहकारका रूपमा काम गरेका थिए । करिब दुई दशक आर्थिक पत्रकारिता गरेका अवस्थी नेपाल आर्थिक पत्रकार समाज (सेजन)का पूर्वअध्यक्षसमेत हुन् ।
व्यवस्थापनमा स्नातकोत्तर गरेका अवस्थीले इन्डियन इन्स्टिच्युट अफ मास कम्युनिकेसनबाट विकास पत्रकारितामा स्नातक तहको अध्ययनसमेत गरेका छन् । अवस्थी अर्थतन्त्र, निजी क्षेत्र, दिगो विकासलगायत मामिलामा जानकार मानिन्छन् ।
