फ्रन्ट पेज प्रिन्ट संस्करण

सत्तागठबन्धनको निर्णय : एमालेका सिटमा जित हासिल गर्ने मुख्य रणनीति, शक्ति सन्तुलनको अध्ययन गर्न पालिकास्तरसम्मै संयन्त्र

स्थानीय निर्वाचनमा तालमेल गर्ने सत्तागठबन्धनको निर्णय

सत्तासाझेदार पाँच दलले स्थानीय तहको निर्वाचनमा अधिकतम सिटमा जित हासिल गर्ने रणनीतिसहित तालमेल गरेर जाने निर्णय गरेका छन् । एमालेले जितेका सिट हात पार्ने मुख्य रणनीतिसहित गठबन्धनले शक्ति सन्तुलनको अध्ययन गर्न पालिकास्तरसम्म संयन्त्र बनाएको छ । 

सत्तासाझेदार पाँचै दलले स्थानीय निर्वाचनमा तालमेल गरेर जाने अलगअलग निर्णय लिएपछि बिहीबार बसेको शीर्ष नेताहरूको बैठकले चुनावमा तालमेल गरेर जाने निर्णय गरेको हो । पाँच दलमा रहेका दलहरूले अन्य दलसँग तालमेल गर्न नपाउने कांग्रेसको प्रस्तावलाई भने अन्य दलका नेताहरूले अस्वीकार गरेका छन् । 

तालमेल गरेर जाने निर्णयसँगै गठबन्धनमा रहेका दलहरूले सातै प्रदेश, ७७ वटै जिल्ला र सात सय ५३ वटै पालिकामा संयन्त्र गठन गर्ने र ती संयन्त्रले त्यहाँ शक्ति सन्तुलन, जितको आधार र गठबन्धनको महत्वबारे प्रतिवेदन मगाउने सहमति गरेका छन् । संयन्त्रले २२ चैतभित्र प्रतिवेदन दिने र त्यसका आधारमा ठोस निर्णय लिइने सञ्चारमन्त्री एवं कांग्रेस नेता ज्ञानेन्द्रबहादुर कार्कीले बताए । 

‘स्थानीय तहको निर्वाचनमा पाँचदलीय गठबन्धनले तालमेल गरेर अघि बढ्ने निर्णय भएको छ । त्यसका लागि दलहरूका प्रदेशस्तरीय प्रमुख रहेको प्रदेशस्तरीय समिति, जिल्लास्तरमा जिल्लाका प्रमुखहरूको समिति र गाउँपालिकास्तरमा गाउँपालिकाका प्रमुखहरूको एउटा संयन्त्र बन्छ,’ बैठकपछि नेता कार्कीले भने, ‘ती संयन्त्रले २२ चैतभित्र सम्बन्धित प्रदेश, जिल्ला र गाउँपालिकामा पाँँच दलको अवस्था कस्तो छ, त्यसबारे केन्द्रलाई प्रतिवेदन पेस गर्नेछन् ।’

नेता कार्कीका अनुसार केन्द्रीय नेतृत्वले समग्र परिस्थितिको विश्लेषण गर्नेछ । संयन्त्रले वस्तुगत आधारमा प्रतिवेदन पेस गरेपछि छलफल गरेर थप निष्कर्षमा पुग्ने उनले जानकारी दिए । ‘जसरी हामी राष्ट्रिय सभामा एक भएर चुनाव लड्यौँ, त्यसैगरी स्थानीय तह निर्वाचनमा पनि एक भएर खडा हुन्छौँ,’ उनले भने, ‘संयन्त्रले वस्तुगत आधारमा काम पूरा गरेर रिपोर्ट पेस गर्छ । त्यसका आधारमा समग्र मुलुकको परिस्थितिबारे केन्द्रले जानकारी लिन्छ र थप निर्णय गर्छौँ ।’ 

१५ चैतमा कांग्रेस केन्द्रीय कार्यसमिति बैठकले आवश्यकता र परिस्थितिका आधारमा स्थानीय तह निर्वाचनमा तालमेल गर्ने निर्णय लिएपछि बिहीबार गठबन्धनको पहिलो बैठक बसेको हो । चुनावी तयारीबारे साझा अवधारणा तय गर्न प्रधानमन्त्री शेरबहादुर देउवाले सत्तागठबन्धनको बैठक बोलाएका थिए । बैठकमा महानगरपालिकाको उम्मेदवारी केन्द्रबाटै निर्णय लिने र उपमहानगरपालिकादेखि तल्लो तहका उम्मेदवारबारे सहमति जुटाउन संयन्त्रले सहजीकरण गर्ने सहमति बनेको छ । प्रमुख प्रतिपक्षी दल एमालेले भने केन्द्रीयस्तरमा गठबन्धन नबनाउने र आवश्यकताका आधारमा स्थानीय तहमा तालमेल गर्न सकिने निर्णय लिइसकेको छ । 

गठबन्धनमा विश्वास बढाउने प्रयास
गठबन्धनलाई लिएर कांग्रेस नेताहरूका अभिव्यक्तिमा एकरूपता नदेखिएकै वेला शीर्ष नेताहरूले भने आपसी विश्वास बनाउने पहल थालेका छन् । तालमेलअनुसार एक–अर्काका उम्मेदवारलाई भोट जाउन् भनेर शीर्ष नेताहरूले विश्वास बढाउने सार्वजनिक अभिव्यक्ति दिएका छन् । 

बिहीबार रिपोर्टर्स क्लब नेपालको २४औँ वार्षिकोत्सव समारोहमा प्रधानमन्त्री शेरबहादुर देउवा र माओवादी केन्द्रका अध्यक्ष प्रचण्डले संविधान, लोकतन्त्र र राष्ट्रियताको रक्षाका लागि बनेको गठबन्धन अगाडि बढ्ने र आपसी सहयोग रहने विश्वास व्यक्त गरेका छन् । 

संयन्त्रले रिपोर्ट दिएपछि थप निर्णय हुन्छ : ज्ञानेन्द्र कार्की नेता, कांग्रेस

स्थानीय तहको निर्वाचनमा पाँचदलीय गठबन्धनले तालमेल गरेर अघि बढ्ने निर्णय भएको छ । त्यसका लागि दलहरूका प्रदेशस्तरीय प्रमुख रहेको प्रदेशस्तरीय समिति, जिल्लास्तरमा जिल्लाका प्रमुखहरूको समिति र गाउँपालिकास्तरमा गाउँपालिकाका प्रमुखहरूको एउटा संयन्त्र बन्छ । ती संयन्त्रले २२ चैतभित्र सम्बन्धित प्रदेश, जिल्ला र गाउँपालिकामा पाँँच दलको अवस्थाबारे केन्द्रलाई प्रतिवेदन पेस गर्नेछन् । समग्र परिस्थितिबारे केन्द्रले जानकारी लिन्छ र थप निर्णय गर्छौँ ।

गठबन्धन अघि बढ्छ, अप्ठ्यारो आए फुकाउँछौँ : शेरबहादुर देउवा सभापति, कांग्रेस

हाम्रो पार्टीले गठबन्धन गरेरै चुनावमा जाने निर्णय गरेको छ, यसमा दुईमत छैन । अरू पार्टीका नेताहरूले मलाई सहयोग गर्नुभएको छ । आपसी सहयोगलाई अझ बढी एकताबद्ध रूपमा अघि बढाउनेछौँ । गठबन्धन अगाडि बढ्नेछ । अप्ठ्यारो फुकाउने र मिलाउने काम राजनीतिक दलहरूको हो, भाग्ने होइन नि ! अप्ठ्यारो समाधान गरेर अघि बढ्छौँ ।

गठबन्धनलाई अगाडि बढाउन अब द्विविधा छैन : प्रचण्ड अध्यक्ष, माओवादी

राष्ट्रियताको रक्षाका निम्ति बनेको गठबन्धनलाई निर्वाचनमा पनि अघि बढाउन प्रस्ट भएका छौँ । कांग्रेसले पनि करिब–करिब गठबन्धन कायम राखेर जाने भनिसकेपछि अब द्विविधा छैन । हामी मिलेर जान्छौँ । निर्वाचन शान्तिपूर्ण, स्वच्छ, निष्पक्ष रूपले सम्पन्न होस् र परिणामले राजनीतिक स्थायित्व र एकतालाई प्रवद्र्धन गरोस् भन्ने हो ।

गठबन्धनको नजर एमालेका सिटमा
एमाले हराउने नीतिअनुरूप एकताबद्ध भएर जाने गठबन्धनमा रहेका दलहरूले निर्णय लिएका छन् । ७५३ स्थानीय तहमध्ये आफूले जितेका सिट सुरक्षित गर्ने र एमालेका सिटमा जित निकाल्ने गरी गठबन्धनमा रहेका दलहरूले रणनीति बनाउँदै छन् । ०७४ को स्थानीय तहमा प्रमुख १२३, उपप्रमुख १३७, अध्यक्ष १७१, उपाध्यक्ष १९४, वडाध्यक्ष दुई हजार २५९, सदस्य पाँच हजार ४५८, महिला सदस्य दुई हजार ७७७ र दलित महिला दुई हजार ६८० सहित कुल १४ हजार ९९ सिट जितेर एमाले पहिलो शक्ति भएको थियो ।

दोस्रो शक्ति बनेको कांग्रेसले प्रमुख १०५, उपप्रमुख ८४, अध्यक्ष १६१, उपाध्यक्ष १३९, वडाध्यक्ष दुई हजार २८७, सदस्य चार हजार ४२३, महिला सदस्य दुई हजार एक सय ५६ र दलित महिला दुई हजार १०१ गरी कुल ११ हजार ४५६ सिटमा जित निकालेको थियो । यसबाहेक माओवादीले प्रमुख ३४, उपप्रमुख ४३, अध्यक्ष ७२, उपाध्यक्ष ६८, वडाध्यक्ष एक हजार १०३, सदस्य दुई हजार ५६, महिला सदस्य एक हजार ३५ र दलित महिला एक हजार ३० मा जित गरी कुल पाँच हजार ४४१ सिटसहित तेस्रो शक्ति बनेको थियो ।