- वि.सं २o८१ जेठ १ मंगलबार
सप्तरीको मलेठमा भएको घटनाको सोमबार पाँच वर्ष पूरा भएको छ । पाँच वर्षअघि आजैका दिन तत्कालीन संयुक्त लोकतान्त्रिक मधेसी मोर्चा, सप्तरीको आह्वानमा नेकपा (एमाले)को मेची–महाकाली अभियानको विरोधमा उत्रिएका प्रदर्शनकारीसँग मलेठमा झडप भएको थियो । अवस्थालाई नियन्त्रणमा लिन सुरक्षाकर्मीले गोली चलाउँदा पाँचजनाको मृत्यु भएको थियो ।
सो घटनामा ज्यान गुमाएकाहरूको स्मृति एवं सम्मानमा राजविराज नगरपालिकाले आज सार्वजनिक बिदा दिएको छ । राजविराज नगरपालिकाका प्रमुख शम्भुप्रसाद यादवले सहिदको सम्मानमा बिदा दिने निर्णय गरिएको बताए । नगरपालिकाले विज्ञप्ति जारी गरी सहिदको सम्झनामा दिइएको सार्वजनिक बिदाको निर्णयमा सहयोग गर्न मातहतका सम्पूर्ण कार्यालयलाई अनुरोध गरेको छ ।
