Skip This
अत्यधिक हिमपातका कारण अफगानिस्तानमा कम्तीमा ४२ जनाको मृत्यु भएको छ। हिमपातमा परी अन्य ७६ जना घाइते भएका स्थानीय सञ्चारमाध्यमहरूले सोमबार जनाएका छन्।
तालिबान सरकारको प्रकोप व्यवस्थापन मामिला मन्त्रालयले देशका १५ प्रान्तमा हिमपात भएको जानकारी दिएको छ। मन्त्रालयका अधिकारीहरूले हिमपातका कारण दुई हजारभन्दा बढी घरहरूमा क्षति पुगेको जनाएका छन्। पछिल्लो २० दिनमा यति ठूलो क्षति भएको बताइएको छ।
प्रतिकूल मौसमका कारण हिमपातबाट प्रभावित भएकाहरूको खोजी, उद्धार तथा राहतका लागि कठिन भइरहेको बताइएको छ। प्रभावितहरूलाई विभिन्न ठाउँमा स्थानान्तरण गरेर अस्थायी शिविरमा राखिएको अधिकारीहरूले जनाएका छन्। रासस/एएनआई
