रौतहटको गौरबाट काठमाडौंतर्फ गइरहेको बसले पूर्व–पश्चिम राजमार्गअन्तर्गत हेटौँडा उपमहानगरपालिका– १९ नेवारपानीमा देउसी खेल्न हिँडेको टोलीलाई ठक्कर दिँदा दुईजनाको ज्यान गएको छ । नौजना घाइते भएका छन् । बागमती प्रदेश ०३ ००१ ख ०९३६ नम्बरको बसले राति १० बजेतिर भैलाराको टोलीलाई ठक्कर दिएको हो ।
मृत्यु हुनेमा हेटौँडा– १९ का २० वर्षीय सुरज विष्ट र चितवनको पिप्ले स्थायी घर भएका ३४ वर्षीय प्रेमबहादुर सिंह ठकुरी रहेको जिल्ला प्रहरी कार्यालय मकवानपुरले जनाएको छ । घाइतेमध्ये पाँचजनाको हेटौँडा– ११ स्थित चुरेहिल अस्पताल र तीनजना घाइतेको भरतपुरमा उपचार भइरहेको मकवानपुर प्रहरीका प्रवक्ता डिएसपी जयश्वर रिमालले बताए । एकजना सामान्य उपचारपछि घर फर्किसकेका छन् ।
दुर्घटनापछि आक्रोशित स्थानीयले बसमा आगजनी गरेका छन् । सडकमा बस आगजनीका कारण केही घन्टा राजमार्ग अवरुद्ध भएको थियो । डिएसपी रिमालका अनुसार बसचालक रौतहटको चन्द्रपुर नगरपालिका– ६ बस्ने ३८ वर्षीय अमितकुमार कार्की र बसमा आगजनी नियन्त्रण र राजमार्ग खुलाउने क्रममा प्रहरीमाथि ढुंगामुढा गर्ने हेटौँडा– १९ का ३२ वर्षीय सुनील ठकुरी पक्राउ परेका हुन् ।