ओखलढुंगामा १६ हजारभन्दा बढी नागरिकलाई कोरोनाविरुद्धको खोप दिइने भएको छ । जिल्लामा दुई चरण गरेर भेरोसेल र जोन्सन एन्ड जोन्सन खोप लगाइने भएको हो ।
जिल्लामा पहिलो चरणमा साउन १७ र १८ गते भेरोसेलको पहिलो मात्रा ५५ वर्षभन्दा माथिका नागरिक, सार्वजनिक सवारीका चालक, सहचालक र निजामती कर्मचारीलाई खोप दिइने जिल्ला स्वास्थ्य कार्यालय ओखलढुंगाका सूचना अधिकारी पुष्पराज पन्तले जानकारी दिए ।
यो चरणमा भेरोसेल खोप १० हजार जनालाई लगाउने लक्ष्य रहेको उनको भनाइ छ । जिल्लामा साउन २४ र २५ गते ५० देखि ५४ वर्ष उमेर समूहका नागरिकलाई जोन्सन एन्ड जोन्सन खोप लगाइनेछ । उक्त खोप ६ हजार जनालाई लगाउने तयारी रहेको जिल्ला स्वास्थ्य कार्यालय ओखलढुंगाले जनाएको छ ।