मुख्य समाचारफ्रन्ट पेजसमाचारदृष्टिकोणअर्थअन्तर्वार्ताखेलकुदविश्वफिचरप्रदेश
  • वि.सं २०७९ माघ १३ शुक्रबार
  • Friday, 27 January, 2023
डा. राजेश साम्भाजीराव पाण्डव, डब्लुएचओ नेपाल प्रमुख
नयाँ पत्रिका काठमाडौं
२०७८ जेठ २१ शुक्रबार ०५:०५:००
Read Time : < 1 मिनेट
मुख्य समाचार प्रिन्ट संस्करण

विश्व स्वास्थ्य संगठनले भन्यो– नेपालमा नयाँ भेरियन्ट फेला परेको छैन

Read Time : < 1 मिनेट
नयाँ पत्रिका, काठमाडौं
२०७८ जेठ २१ शुक्रबार ०५:०५:००

बेलायतको पत्रिका डेली मेलले नेपालमा कोरोना भाइरसको नयाँ भेरियन्ट देखिएको भन्दै समाचार प्रकाशित गरेकोमा नेपाल सरकारले आपत्ति प्रकट गरेको छ । स्वास्थ्य मन्त्रालयले बिहीबार विज्ञप्ति जारी गर्दै नेपालमा कोभिडको छुट्टै नयाँ भेरियन्ट फैलिएको भन्ने समाचारमा कुनै सत्यता नभएको स्पष्ट पारेको छ ।

स्वास्थ्य मन्त्रालयका प्रवक्ता डा.कृष्ण पौडेलले नेपालमा कुनै नयाँ भेरियन्ट नदेखिएको बताए । ‘अहिलेसम्म नेपालमा नयाँ भेरियन्ट देखिएको छैन,’ उनले भने, ‘बुधबारसम्म बेलायतले हामीलाई उपलब्ध गराएको सूचनाअनुसार त्यस्तो केही छैन ।’ पौडेलका अनुसार नेपालबाट विदेश गएका नेपालीहरूको कोभिड परीक्षण विभिन्न देशमा भइरहेको छ । तर, कुनै पनि देशमा नयाँ भेरिएन्ट देखिएको जानकारी नआएको उनको भनाइ छ ।

विश्व स्वास्थ्य संगठन (डब्लुएचओ) ले पनि नेपालमा कुनै नयाँ भेरियन्ट हालसम्म पुष्टि नभएको बताएको छ । डब्लुएचओको नेपालस्थित कार्यालयले नेपालमा नयाँ भेरियन्ट फेला परेकोबारे ‘अवगत नभएको’ जनाएको हो । ‘नेपालमा सार्स कोभिड–२ को नयाँ भेरियन्ट फेला परेको भन्ने कुरामा विश्व स्वास्थ्य संगठन अवगत छैन । नेपालमा रहेका भेरियन्टहरू अल्फा (बी.१.१.७), डेल्टा (बी.१.६१७.२) र काप्पा (बी.१.६१७.१) हुन् । यी तीनमध्ये नेपालमा हाल सक्रिय रहेको भेरियन्ट डेल्टा हो,’ डब्लुएचओ नेपाल प्रमुख डा. राजेश साम्भाजीराव पाण्डवले नयाँ पत्रिकासँग भने ।

नेपालले भारतस्थित प्रयोगशालामा गराएको जीन सिक्वन्सिङको पछिल्लो नतिजा ४ जेठमा सार्वजनिक गरेको थियो । त्यसैबाट भारतमा देखिएका डेल्टा तथा काप्पा भेरियन्ट पुष्टि भएको स्वास्थ्य मन्त्रालयले जनाएको थियो । 

डेली मेलको समाचारमा लेखिएको छ, ‘नेपालको नयाँ भेरियन्ट युरोपमा पनि फैलिसकेको छ । यसले बेलायतको बिदालाई असर पारको छ । यो भाइरसमा कोभिड खोपहरूले काम गर्न नसक्ने वैज्ञानिकहरूको आशंका छ ।’