नेपाल पत्रकार महासंघ काठमाडौं शाखाको पहलमा वसुन्धारास्थित केडिसी पिसिआर ल्याबले पत्रकारलाई ५० प्रतिशत छुटमा पिसिआर परीक्षण गरिदिने भएको छ । पत्रकारले महामारीको समयमा आफ्नो जीवनको पर्वाह नगरी अग्रभागमा रहेर नागरिकलाई सुसूचित गराउने हुँदा सामाजिक दाहित्वअनुसार छुटको व्यवस्था गरिएकोे ल्याब प्रशासन प्रमुख अनिल सापकोटाले बताए ।
कान्तिपुर डेन्टल कलेज परिसरमा रहेको उक्त ल्याब व्यवस्थापन र नेपाल पत्रकार महासंघ काठमाडौं शाखाबीच सम्झौता भएको छ । दिनको करिब सात सयजनाको पिसिआर रिपोर्ट दिन सक्ने उक्त ल्याबले करिब ६ देखि ८ घन्टामा पिसिआर रिपोर्ट दिन सक्ने जनाएको छ ।
ल्याब बिहान ६ बजेदेखि रातिको १२ बजेसम्म खुल्नेछ भने दुई हजार पाँच सय लिएर बिहान ९ बजेदेखि बेलुकी ६ बजेसम्म संक्रमित वा संक्रमणको आशंका भएका नागरिकको घरमै गएर दक्ष स्वास्थ्य जनशक्तिले सुरक्षित रूपमा स्वाब संकलन गर्ने पनि सापकोटाले बताए ।
पत्रकार महासंघ काठमाडौ शाखाका अध्यक्ष सूर्य सुवेदीका अनुसार नेपाल पत्रकार महासंघ काठमाडौं शाखा सदस्यहरू, ललितपुर शाखा सदस्यहरू, भक्तपुर शाखा सदस्यहरू, सम्पूर्ण प्रतिष्ठान शाखाका सदस्यहरू र एसोसिएट शाखा सदस्यले आफ्नो परिचयपत्र देखाएर छुट सुविधा लिन सक्नेछन् ।