प्रधानमन्त्री केपी शर्मा ओलीले देशमा राजनीतिक समस्या निम्त्याउन खोजिएको दाबी गरेका छन् । काठमाडौंको चोभारमा रहेको सुवर्णकीर्ति महाविहारमा जेष्ट नागरिक आवासगृहको शिलान्यास कार्यक्रममा उनले राजनीतिक समस्या निम्त्याउन बलजफ्ती प्रयास भए पनि सफल नहुने दाबी गरे ।
उनले देशमा हत्या हिंसाको विकराल कालखण्ड फर्काउने कोसिस भइरहेको भन्दै सबैलाई सचेत हुन आग्रह पनि गरे । हत्या हिंसाको गतिविधि हुन नदिन सरकार चनाखो रहेको उनको भनाइ छ । मोरङको मिक्लाजुङमा भएको हत्याको प्रसंग उल्लेख गर्दै ओलीले हत्या हिंसाको पुरानो कालखण्ड दोहोरिन नसक्ने बताए ।
प्रधानमन्त्री ओलीले बुद्धका उपदेशले नै संसारमा मैत्री, करुणा र भाइचाराको सम्बन्ध स्थापित भएको बताए ।
कार्यक्रममा ओलीकी धर्मपत्नी एवं प्रथम महिला राधिका शाक्यले जेष्ट नागरिक भवन निर्माणका लागि पाँच लाख रुपैयाँ सहयोग गर्ने घोषणा गरेकी छिन् ।