- वि.सं २o८१ बैशाख २४ सोमबार
राष्ट्रिय मानव अधिकार आयोगले अनशनरत डा. गोविन्द केसीसँग सार्थक र्वाता गरेर उनको जीव रक्षा गर्न सरकारलाई निर्देशन दिएको छ ।
आयोगले डा. गोविन्द केसीको मागबारे विमतिका विषय वार्ताको माध्यमबाट समाधान गर्न तथा आमरण अनशनजस्तो जीवन नै जोखिममा पर्न सक्ने जटिल विकल्प नरोज्न आग्रह गरेको छ ।
आयोगका सचिव वेद भट्टराईले आज जारी गरेको विज्ञप्तिमार्फत चिकित्सा शिक्षाजस्तो आधारभूत मानव अधिकारको विषयप्रति संवेदनशील भएर डा. केसीसँग नेपाल सरकारले विगतमा पटक-पटक गरेका सम्झौताप्रति गम्भीर बन्न आग्रह गरेको छ । आयोगले उनको जीवन रक्षाका लागि हरसम्भव प्रयास गर्न तथा विगतमा भएका सम्झौताको कार्यान्वयन स्थिति सार्वजनिक गर्न सरकारको ध्यानाकर्षण गरिएको छ ।
साथै डा. केसीको जीवनरक्षाका लागि आवश्यक पहल गरिदिन अनुरोध गर्दै नेपाल चिकित्सक संंघलगायत विभिन्न संघसंस्थाले आयोगमा ज्ञापनपत्र पेस गरेकोप्रति पनि आयोगले ध्यानाकर्षण भएको जनाएको छ ।
डा. केसी चिकित्सा शिक्षा सुधारका लागि सरकारसँग विगतमा भएका सम्झौताको कार्यान्वयनको माग राखी ११ दिनदेखि आमरण अनशनमा छन् ।
