- वि.सं २o८३ श्रावण १५ शुक्रबार
मुग्लिन–नारायणगढ सडकखण्डअन्तर्गत नाम्सी पुलनजिक शुक्रबार पहिरो खस्दा सडक एकतर्फी अवरुद्ध भएको छ ।
सडक डिभिजन भरतपुरका अनुसार पहिरो खसेपछि उक्त स्थानमा सवारी आवागमन प्रभावित भएको छ । पहिरो हटाउन सडक डिभिजनको तैनाथ मेसिन तत्काल घटनास्थलमा परिचालन गरिएको छ ।
प्राविधिक टोलीले पहिरो हटाउने काम सुरु गरिसकेको र सडक पूर्ण रूपमा दुईतर्फी सञ्चालनमा ल्याउन करिब एक घण्टा लाग्ने अनुमान गरिएको सडक डिभिजनले जनाएको छ ।
वर्षायामका कारण उक्त सडकखण्डमा पटक–पटक पहिरो खस्ने क्रम जारी रहेकाले सवारीचालकलाई उच्च सतर्कता अपनाउन आग्रह गरिएको छ ।
आवश्यकबाहेक यात्रा नगर्न तथा यात्रा गर्नैपरे सडकको पछिल्लो अवस्थाबारे जानकारी लिएर मात्र यात्रा गर्न सडक डिभिजनले अनुरोध गरेको छ ।
2022-09-29-12-22-58.jpeg)
