
अछामका रत्नकला भण्डारी र निमदेवी खनाल महिनावारी भएपछि छाउ बार्न (रजस्वला भएका वेला) भन्दै बारीमा त्रिपाल टाँगेर चार दिनदेखि सुत्दै आएका थिए । बिहीबार रत्नकलाकी सात वर्षीया छोरी कविता पनि आमासँग सुत्न पुगेकी थिइन् ।
तर, लगातार वर्षा भइरहेका वेला बिहीबार राति भिरबाट खसेको ढुंगा त्रिपालमा बज्रियो । पञ्चदेवल विनायक नगरपालिका– ८ बारलास्थित सेलापानी चुरखोली टोलमा भएको घटनामा निमदेवी र रत्नाकलाकी छोरी कविताको घटनास्थलमै मृत्यु भएको प्रहरी कार्यालय अछामका प्रमुख प्रहरी नायब उपरीक्षक ओमप्रकाश खनालले बताए । आमा रत्नकलाको टाउकोमा गम्भीर चोट लागेको छ । उनको सुर्खेतस्थित प्रादेशिक अस्पतालमा उपचार भइरहेको छ ।
मंगलसेन– ६ का स्थायी बासिन्दा गोरबहादुर भण्डारी केही समययता श्रीमती रत्ना र छोरी कवितासहित ससुराली गाउँ बारलाको चुरखोलीमा बस्दै आएका थिए । यो टोलमा छाउगोठ नहुँदा यसअघि पनि उनीहरू महिनावारी चरणमा सधैँ यसैगरी त्रिपालमुनि रात कटाउने गरेका थिए । ‘पहिलादेखि नै यसैगरी बस्ने रहेछन्,’ डिएसपी खनालले भने, ‘गोठ भएका गोठमा र नभएकाहरू त्रिपालमै बस्ने गरेको देखिन्छ ।’ जिल्लाका अन्य ठाउँ पुग्दा पनि सबैतिर यस्तै देखेको उनले बताए ।
पञ्चदेवल विनायक नगरपालिका– ८ बारलास्थित सेलापानी चुरखोली टोलमा छाउगोठ हटाइएको थियो । सरकारले छाउगोठ भत्काएपछि अहिले अस्थायी रूपमा त्रिपाल टाँगेर महिनावारी बार्ने गरिएको छ ।